व्यवसायीका  काममा हस्तक्षेप हुन दिदैन : मन्त्री महासेठ

न्यूज ब्यूरो, काठमाडौँ । भौतिक पूर्वाधार तथा यातायात मन्त्री रघुवीर महासेठले निर्माण व्यवसायीका जायज काममा सरकारी हस्तक्षेप नहुने प्रतिबद्धता जनाएका छन् ।

नेपाल निर्माण व्यवसायी महासङ्घले ११ औँ राष्ट्रिय निर्माण दिवसको अवसरमा आयोजना गरेको प्रभातफेरी कार्यक्रममा मन्त्री महासेठले व्यवसायीका काममा सरकारी हस्तक्षेप हुन नदिने प्रतिवद्धता जाहेर गर्दै देश बनाउने जिम्मेवारी निर्माण व्यवसायीकै हो बताए । मन्त्री महासेठले पूर्ण शक्तिका साथ देश निर्माणमा जुट्न व्यवसायीलाई अनुरोध समेत गरे ।

उनले भने, “विगतमा व्यवसायी र सरकार दुवै पक्षबाट कमी कमजोरी भए होेलान्, अब त्यस्ता कमी कमजोरी सच्यााएर अघि बढ्नुको विकल्प छैन । २०५२ सालदेखि विभिन्न कारणले पूरा नभएका योजनाको म्याद थप गर्ने प्रक्रिया शुरु भइसकेको जानकारी दिए ।

महासंघका अध्यक्ष रवि सिंहले निर्माण व्यवसायलाई स्थापित पेशा बनाउन वर्तमान नेतृत्व क्रियाशील रहेको बताउँदै अहिलेको सरकारको नारा ‘समृद्ध नेपाल सुखी नेपाली’लाई साकार बनाउन महासङ्घ प्रतिबद्ध रहेको थपे ।

निर्माणमैत्री वातावरण अहिलेको आवश्यकता भएको बताउँदै महासंघ उपाध्यक्ष आङदोर्जी लामाले भौतिक पूर्वाधारको निर्माणबिना समृद्ध नेपालको परिकल्पना गर्न नसकिने बताए । महासङ्घका महासचिव रोशन दाहालले सरकार र व्यवसायीबीचको सहकार्यबाट मात्र निर्माण क्षेत्रको विकास हुने बताए ।