सुन्दर शान्त नेपाल को लागि देशभक्ति जाग्नुपर्छ : वडाध्यक्ष सिँह

न्यूज ब्यूरो, जनकपुरधाम । जनकपुरधाम उपमहानगरपालिका वडा नं. ४ का वडाध्यक्ष सुरदर्शन सिँहले सुन्दर शान्त नेपाल निर्माणको लागि मनमा देशभक्ति जगाउनु आवश्यक रहेको बताएका छन् ।

गैर सरकारी एवम् समाजिक सँस्था सपोर्ट नेपाल धनुषाले आयोजना गरेको सुन्दर शान्त नेपाल परियोजना अन्तर्गतको सरोकारबाहरुको बहसको क्रममा वडाध्यक्ष सिँहले देशलाई सुन्दर र शान्त बनाउनको लागि मनैदेखि देशप्रतिको माया, स्नेह र देशभक्ति जाग्नु आवश्यकता औल्याए ।

देशको पौराणिक तथा परापूर्वकालको बारेमा बोल्दै उनले देशमा राजतन्त्र भएकै बेला सुन्दर शान्त नेपाल रहेको एवम् वर्तमान समयमा प्रजातन्त्र आएपनि अधिकांशको मनमा देशभक्ति नभएकै कारण सुन्दर शान्त नेपालको परिकल्पना कठिनाई देखिएको छ ।

उनले भने, - "राजतन्त्र भएको बेलामा पनि नेपाल, हाम्रो देश सुन्दर र शान्त पनि थियो । जनआन्दोलनबाट आएको लोकतन्त्र, प्रजातन्त्र र संघीयता शासन जनताको हातमा भएपनि सुन्दर शान्त नेपाल कत्तै देखिएको छैन ।"

युवाहरुलाई देशप्रतिको माया, ममता, स्नेह र मनैदेखि देशभक्ति जगाउनको लागि अभियान सुरु गर्न लागेको जनाउँदै वडाध्यक्ष सिँहले त्यसको लागि १५ सय नेपाली झण्डा भएको ब्याच वितरण गर्ने बताए ।

उनले भने, - "तराई मधेश नेपालको अभिन्न अँग हो, जो एउटै देशको भागहरु हुन । तर केही तत्वहरुले यसलाई स्वीकार गर्न चाहिरहेको छैन । देशप्रतिको माया र देश के हुन्छ, पहिचान के हुन्छ ? यसको बारेमा अर्ध ज्ञान भएकै कारण पनि हुन सक्छ की उनीहरुले सुन्दर शान्त नेपालको परिकल्पनालाई साकार गर्न मात दिनेछ । यहाँका युृवाहरुमा देशभक्ति जगाउन गइरहेका छौँ । पहिलो अभियानमा १५ सय नेपाली झण्डाको कोट ब्याच वितरण गर्छौ र त्यसपछि अभियानलाई निरन्तरता दिनेछौ ।"

तराई मधेशमा जातजाती, कोटाको नाममा आफ्नै देशमा जनताहरु एकअर्कादेखि विभाजन भईरहेको भन्दै यसमा राजनीतिक दलको पनि ठुलै हात रहेको आरोप लगाए । सिँहको यस्तो अभियानलाई समर्थन गर्दै सहभागीहरुले प्रशंसा समेत गरेको थियो ।