जनकपुर यातायात कार्यालय बर्दिवास सर्ने हल्ला मात्र

न्यूज ब्यूरो, जनकपुरधाम । विगत केही दिनदेखि जनकपुर यातायात कार्यालय बर्दिवास सर्ने तथ्यलाई हल्ला मात्र भएको बताइएको छ ।

लाईसेन्सको अनलाईन फारममा कटौती गरेको भन्दै यातायात व्यवस्था विभाग अन्तर्गतको जनकपुर यातायात कार्यालय षडयन्त्रपूर्वक बर्दिवास सारिन लागिएको भन्दै सेवाग्राहीहरु आन्दोलन थालेका थिए ।

बुधबार विहान जनकपुर यातायात कार्यालयका निमित्त प्रमुख अजिम मन्सुरले एक पत्रकार सम्मेलनको आयोजना गरी यातायात व्यवस्था कार्यालय जनकपुर बर्दिवासमा सार्न लागेको समाचारलाई निराधार बताए ।

सेवाग्राहीहरुले विगतमा लाईसेन्सको लागि दैनिक ३०० कोटा उपलब्ध गराउँदै आएकोमा केही दिनदेखि त्यसमा कटौती गदैै १०० मा झारेको भन्दै सेवाग्राहीह यसलाई कार्यालय बर्दिवास सार्ने षडयन्त्र भन्दै आन्दोलनमा उत्रेका थिए ।

पत्रकार सम्मेलनमा निमित्त प्रमुख मन्सुरले लाईसेन्सको सम्बन्धमा आवश्यकता हेरी सम्बन्धित निकायसँग परामर्श र छलफल गरी कोटा बढाउन सकिने बताए । विभाग अथवा मन्त्रालयबाट कार्यालय सार्ने बिषयमा कुनैपनि निर्देशन प्राप्त नभएको बताउँदै यस कार्यालय मार्फत एक दिनमा ३ सय २० जनाले फारम भर्न पाउने दाबी गरे ।

पत्रकार सम्मेलनमा नि. प्रंमुख मन्सुरले सेवाग्राहीको चाप र भीड नियन्त्रण गर्नका लागि मात्र यस्तो व्यवस्था मिलाईएको र कोटाको सम्बन्धमा कुनै विवाद नरहेको समेत स्पष्ट पार्दै अनलाईन फारम सधै खुल्ला नै रहने जीकिर गरे ।

चाप नियन्त्रण र कुशल कार्यसँचालनको लागि मात्र दैनिक रुपमा कोटा उपलब्ध गराउँदै आएको तथा एक पटकको फारामलाई व्यवस्थित गरी मात्र अर्को फाराम खुल्लाको सूचना प्रकाशित गर्ने गरेको बताए ।

उनले बर्दिबासमा रहेको सेवा केन्द्र २०७१ सालमा नै त्यहाँ स्थापना गरिएको र सो बिषयलाई अहिले आएर कोट्याउनु सान्दर्भिक नरहेको समेत जिकिर गरेका छन । बर्दिबासमा १ सय मात्र कोटा रहेको र त्यस कार्यालयले मोटरसाइकल तथा स्कुटरको मात्र दर्ता गर्न पाउने उनले बताए ।

यातायात व्यवस्था कार्यालय जनकपुर बर्दिबास सर्न लागेको समाचार यसअघि सञ्चारमाध्यम र सामाजिक सञ्जालमा चर्चाको बिषय बनेको छ । यातायात व्यवस्था मन्त्री रघुविर महासेठले नै जनकपुर यातायात कार्यालय बर्दिवास सार्न लागिएको तथ्य समाचारहरु विभिन्न सँचारमाध्यममा आएपछि मन्त्री महासेठले समेत स्पष्टोक्ति दिएका छन् ।

पत्रकार सम्मेलनमा मार्फत यातायातका कर्मचारीले समेत कार्यालय सर्ने कुनै तुक नरहेको बताउँदै जनमानसमा ढुक्क हुन आग्रह गरे ।