जनकपुरमा फालिएको अवस्थामा नवजात शिशु फेला

न्यूज ब्युरो, जनकपुरधाम । पटक पटक बेबारिसे शिशु फेला पर्दै आएको जनकपुरमा पुनः फालिएको अवस्थामा एक नवजात शिशु फेला परेको छ ।

मँगलबार जनकपुरधाम उपमहानगरपालिका वडा नं. ७ स्थित रहेको जानकी सरोवरको उत्तरी डिल (महार) मा अन्दाजी ४ दिनको नवजात शिशु झाडीमा फेला परेको हो । झाडीमा फालिएको अवस्थामा शिशु देखेपछि वडाध्यक्ष जानकीराम साहलाई स्थानीयहरुले खवर गरेपछि वडाध्यक्ष साहले प्रहरीको सहायतामा शिशुको उद्धार गरी जनकपुर अञ्चल अस्पतालमा उपचारको लागि भर्ना गराएको जनाइएको छ ।

स्थानीयहरुले देखेको वखत शिशुको मुखभरी किरा परेको थियो । अहिले उपचार पछि शिशुको अवस्था समान्य रहेको बुझिएको छ । स्थानीयले जन्मिने वितिकै कसैले छोरी भएकै कारण शिशुलाई झाडीमा फालेको हुन सक्ने आशंका गरेका छन् । शिशु ४/ ५ दिन अघि जन्मेको र केहि समय पश्चात फालेको हुन सक्ने प्रहरीले जनाएको छ ।

एकातर्फ प्रदेश नं. २ का सरकाले बेटी पढाउ बेटी बचाउ अभियानलाई तीव्रता दिएका छन् भने प्रदेशकै राजधानीमा दिनानुदिन यस्ता प्रकारका घटनाहरु दोहरिन थालेपछि प्रदेश सरकारलाई थप चुनौति बढेको छ ।

लैँगिक हिँसा विरुद्धको १६ दिने अभियानमा सरोकारबालाहरुले लैंगिक हिँसाको खुलेर विरोध गरेपनि अवैद्य सम्बन्ध र वैदेशिक रोजगारीले फैलाएको आन्तरिक हिँसालाई प्रदेश सरकारले समान्य रुपमा लिएको देखिएको छ ।

प्रदेश सरकारले स्थानीय नीजी अस्पतालहरु उपर कडा नियम र कारवाहीको दायरा तोक्न सके यस्ता क्रियाकलाप परास्त गर्न सकिने सम्भावना प्रबल देखिन्छ । अस्पतालको दैनिक तथ्याँक स्थानीय प्रशासनले निरन्तरता दिएपछि अवैद्य गर्भपतन, लैंगिक हिँसा जस्ता क्रियाकलापहरु न्यून हुने छ ।