जनकपुरको यातायात अफिस बर्दिवास सार्दै, सेवाग्राही आन्दोलनमा !

न्यूज ब्यूरो, जनकपुरधाम । जनकपुरधाममा रहेको यातायात कार्यालयलाई महोत्तरीको बर्दिवास सार्न लागिएको भन्दै सेवाग्राहीहरु आन्दोलित भएका छन् ।

विगतदेखि नै यातायात अफिस बर्दिवास सार्न लागिएको षडयन्त्र भईरहेको विभिन्न सँचारमाध्यमहरुमा समाचार प्रकाशित प्रकाशन भएपछि कार्यालय प्रमुखले त्यसलाई निराधार बताएका थिए ।

प्रदेश नं. २ का सरकारले यातायात व्यवस्था विभाग अन्तर्गतको यातायात कार्यालयहरुलाई आफ्नो माहतमा राख्न कसरत गरिरहेका बेला संघीय सरकारले नै षडयन्त्र गरी जनकपुरभन्दा ३५ किलोमिटर टाढा सार्न लागिएको खवर भएलगत्तै उनीहरु आन्दोलनमा उत्रेका छन् ।

जनकपुर सहित वीरगंज र लहानको कार्यालयलाई समेत आफ्नै मातहतमा ल्याउन लागेको बेला संघीय सरकारको भौतिक पूर्वाधार तथा यातायात मन्त्रालयले सबै कार्यालयलाई आफ्नो मातहत ल्याएर जनकपुर कार्यालयलाई पनि बर्दिवास सार्न लागेको आरोप सेवाग्राहीको छ ।

दैनिक ५ सय भन्दा बढि सवारी चालक अनुमति पत्र वितरण गर्दै आएको जनकपुर शाखालाई शाखा कार्यालयको रुपमा रहेको बर्दिवास स्थित यातायात कार्यालयमा सार्न लागिएको बुझिएको छ ।

दैनिक ३ सय ६० थान सवारी चालक अनुमतिपत्र जारी गर्न यातायात व्यवस्था विभागले अनुमति दिएको छ भने जनकपुरस्थित यातायात व्यवस्था कार्यालयलाई दुईपांग्रे र चार पांग्रे गरी मात्र १ सय ८० वटा लाईसेन्स प्रदान गर्न स्वीकृति दिइएको छ ।

यताका सेवाग्राहीहरुले लाईसेन्सको लागि ३५ किलोमिटरको दुरीमा रहेको बर्दिबास भन्दा सर्लाहीको लालबन्दीमा अनुमति दिनुपर्ने माग गर्दै कामकाज ठप्प गरेका हुन् ।

यातायात मन्त्री रघुवीर महासेठकै चलखेलमा कार्यालय सार्न लागिएको भन्दै सर्वसाधारणले सोमबार यातायात व्यवस्था कार्यालय जनकपुरको कामकाज २ घण्टा सम्म ठप्प पारेका हुन ।

यता, यातायात कार्यालयका निमित्त प्रमुख अजिम मन्सुरले यातायात कार्यालय सार्ने हल्ला निराधार रहेको बताउँदै दैनिक दिने गरेको लाईसेन्स कोटामा कटौती गरेको स्वीकार गरे ।

यस सम्बन्धमा यातायात विभाग कार्यालयका डिजी लवन्य कुमार ढकालले भने कुनै प्रतिक्रिया दिन चाहेनन् ।

यसैबीच, धनुषा चेम्बर अफ कमर्सले एक विज्ञप्ति जारी गर्दै यातायात व्यवस्था कार्यालय जनकपुर बर्दिबास सार्न खोजिएको भन्दै आपत्ति जनाउँदै नियोजित रुपमा यातायात व्यवस्था कार्यालय जनकपुरबाट सारिए कडा संघर्ष गर्ने चेतावनी दिए ।

लाईसेन्सको लािग अहिले हजारौँको सँख्यामा सेवाग्राहीहरु दिनभरी बसेर घर फर्कने गरेको छ । त्यस उपर लाईसेन्स कोटामा कटौती गरेपछि यस क्षेत्रका सवारी चालकहरु विच्चलीमा परेका छन् ।

अनलाईन फाराम आव्हान गरिएपनि कोटामा कटौतीका कारण लाईसेन्सको लागि फाराम भर्न नपाएर उनीहरु आक्रोसित समेत बनेका छन् ।