मधेशमा आज रंगभेद विरुद्धको दिवस, सिरहाबाट १ पक्राउ !

न्यूज ब्यूरो, सिरहा । मधेशका विभिन्न जिल्लाहरुमा आज रंगभेद विरुद्धको दिवस मनाइँदैछ । मधेशीहरुसँग रंगका आधारमा नेपाल सरकारले विभेद गर्दै आएको विरोधमा प्रत्येक वर्ष झँै यस वर्ष पनि रंगभेद विरुद्धको दिवस मनाउँदैछन् ।

स्वतन्त्र मधेश गठबन्धनलगायत मधेशी नागरिक समाजले सोमबार मधेशका विभिन्न स्थानमा रंगभेद विरुद्ध कार्यक्रम गरी मनाउँदैछ । डा. सीके राउत नेतृत्वको स्वतन्त्र मधेश गठबन्धनले यस पटक मधेश भरी नै ‘रगंभेदका अन्त हो, मधेश देश स्वतन्त्र हो’ नाराको साथ रगंभेद दिवस मनाउँदैछ ।

‘मधेशीहरुको रंगको आधारमा नेपालको प्रत्येक कार्यालय, सार्वजनिक स्थल, सभा सम्मेलन र यात्राको क्रममा समेत विभेद गरिन्छ । यो विभेद अफ्रिकाको काला गोराभन्दा कति पनि कम छैन’ गठबन्धनले भनेको छ ।

अघिल्लो सार्क सम्मेलनको क्रममा मंसिर १० गते नै काठमाडौंबाट करिब चार सयभन्दाअधिक मधेशीहरुलाई रंगको आधारमा सरकारद्धारा पक्राउ गरिएको थियो । सोही दिनको सम्झनामा र रंगभेदको विरुद्ध आज मधेशका अधिकांश जिल्लामा प्रदर्शन भईरहेको छ ।

यता, रंगभेद विरुद्धको दिवस मनाईरहेका बेला सिरहाबाट १ जनालाई प्रहरीले पक्राउ गरेको छ । पक्राउ पर्नेमा सिरहाको मिर्चैया नगरपालिका–१० का स्वराजी निर्मल मण्डल रहेको छ ।

उनलाई सिरहाको नवराजपुर गाउँपालिका–१ तमसियाबाट पक्राउ गरिएको हो ।