जनकपुरको कवाडखानामा भिषण आगलगी, ८ लाखको क्षति !

न्यूज ब्यूरो, जनकपुरधाम । जनकपुरमा एक कवाडखानामा भिषण आगलगी भएको छ ।

जनकपुरधाम उपमहानगरपालिका वडा नं. ६ डोमटोल स्थित रहेको कवाडखानामा अचानक भएको आगलगीबाट करिब ८ लाख मूल्य बराबरको क्षति भएको जिल्ला प्रहरी कार्यालय धनुषाले जनाएको छ ।

आगलगीबाट कुनै प्रकारको मानवीय क्षति भने नभएको प्रहरीले जनाएको छ ।

भारत विहारको दरभँगा जिल्ला निवासी तथा हाल जनकपुरधाम उपमहानगरपालिका वडा नंं. ६ डोमबस्ती बस्दै आएकी सिया देवी दासको उक्त कवाडखानामा अचानक आगलगी भएको प्रहरीले जनाएको छ ।

कवाडमा पुराना समाग्रीहरु भएको अवस्था आगलगी कसरी भएको बारे अनुसन्धान भईरहेको प्रहरीले जनाएको छ । आगो निभाउन समयमै नगरपालिकाको दमकल पुगेर आगो नियन्त्रणमा लिएपनि त्यतिबेलासम्म आगोले सबै समाग्रीलाई आफ्नो चपेटामा लगिसकेको थियो ।