SYN को RTI तालिममा सांसद यादवले भनेः ‘भौतिक विकासभन्दा सूचनाको विकास आवश्यक’

न्यूज ब्यूरो, सिरहा । सूचनाको हक सम्बन्धि ऐनको प्रभावकारी कार्यान्वयनले मुलुकमा सुशासन, पारदर्शिता र सरकारलाई जिम्मेवार बनाउने राजपा नेपालका अध्यक्ष मण्डलका सदस्य तथा सिरहा निर्वाचन क्षेत्र नं. ४ का प्रतिनिधिसभा सांसद राजकिशोर यादवले बताएका छन् । सिरहा युवा संजालले आयोजना गरेको १ दिने सूचनाको हक सम्बन्धि अभिमुखिकरण तालिममा सांसद यादवले आम जनताले सम्बन्धित निकायमा सूचना माग गर्ने बानीको विकास भए यसले भ्रष्टाचारलाई नियन्त्रण गर्दै जवाफदेहीतालाई बढाउने विश्वास व्यक्त गरेका हुन् ।

उहाँले जनताको गुनासो सम्बोधन गर्ने उद्देश्यले निर्माण भएको सूचनाको हक सम्बन्धि कानुनको अभ्यास जनताले जति धेरै गरे यसको सार्थकता त्यती बढ्ने धारणा राख्नुभयो । सूचनाको हक भन्ने ऐनले राष्ट्रलाई बलियो बनाउने भएकाले आम जनताले यो ऐनको बढी भन्दा बढी प्रयोग गर्न सबैलाई प्रोत्साहन गर्नुपर्ने उहाँले विचार व्यक्त गर्नुभयो ।

संजालमा आवद्ध युवाहरुको यसप्रकारका सराहनीय कदम र अभियानले आफु भावुक बनेको र अफुमा खुशीको सिमा नरहेको बताउँदै संजालमा आवद्ध सबैलाई धन्यवाद ज्ञापन गर्नुभयो । सांसद यादवले संजाललाई सदैव आर्थिक तथा भौतिक सहयोग गर्न तयार रहेको बताउनुभयो ।

सिरहा जिल्लाका युवाहरुको साझा संगठन सिरहा युवा संजालले संवैधानिक व्यावस्था अनुसार सूचनाको हक सबैले सहज तरिकाले प्रयोग गर्न पाउने उद्देश्यले बुधबार १ दिने सूचनाको हक सम्बन्धि अभिमुखिकरण तालिम आयोजना गरेको थियो ।

सिरहा युवा संजालकी उपाध्यक्ष प्रतिक्षा यादवले संजालको उद्देश्य र कार्यबारे प्रकाश पार्दै सूचनाको हक सम्बन्धि ऐनको प्रयोग बढेपछि लोकतन्त्र बलियो हुने भएकाले हरेक सरकारी अड्डाबाट सर्वसाधारणले सूचना सहजै पाउने वातावरण निर्माण हुनुपर्ने धारणा राखिन् । अपारदर्शिता र भ्रष्टाचार हुने सरकारी निकायबाट सूचना गुमाउने गरिएको व्यापक गुनासोहरु उठ्ने गरेकाले समय समयमा जन सरोकारका कार्यालयहरुले कार्यालयका गतिविधी सार्वजनिक गर्नुपर्ने उपाध्यक्ष यादवको भनाई रहेको थियो ।

कार्यक्रममा गोलबजार नगरपालिकाका नगरप्रमुख देवनाथ साहले माग र आपूर्तीको सिद्धान्तमा निर्माण गरिएको सुचनाको हक सम्बन्धि कानुनको सफलता दुवै पक्षको सन्तुलित अभ्यासमा केन्द्रित रहेको बताउँदै सरकारी कार्यालयमा माग गरिएको सुचनाको सदुपयोगले राष्ट्रको पक्षमा सकारात्मक परिणाम दिने र दुरुपयोगले नकारात्मक परिणाम दिने भएकाले कानुनको प्रयोग गर्दा प्रयोगकर्ताले राष्ट्रिय हितलाई दृष्टिगत गर्नु आवश्यक रहेको धारणा व्यक्त गर्नुभयो ।

कार्यक्रमका सहभागिहरुले स्थानिय तहहरुमा अहिलेपनि सूूचना अधिकृत नतोकिएको र तोकिएपनि सूचना प्राप्त गर्न कठिनाई भएको गुनासो पोखेका थिए । उनीहरुले सूचनाको हक सम्बन्धी तालिम हरेकठाउँसम्म पुर्याउन आवश्यक रहेको बिचार ब्यक्त गरे ।

सिरहा युवा संजालले आयोजना गरेको सो तालिममा सूचना अभियन्ता तथा उक्त तालिमका प्रशिक्षक सरफुल्लाह अन्सारीले सबै युवाहरुले हरेक ठाउँ, क्षेत्र र निकायको आर्थिक लगायत हरेक सार्वजनिक गतिविधि बारे सूचना माग्ने अभियान संचालन गरेमा वैदेशिक रोजगार तिर युवाहरुलाई पलायन पनि नहुनुपर्ने विश्वास व्यक्त गर्नुभयो । नेपालको संविधान २०७२ ले नैसर्गिक आधाभूत अधिकारको रुपमा प्रदान गरेको सूचनाको हकलाई हरेक नेपाली नागरिकले उपयोग गर्न आवश्यक रहेको अन्सारीको भनाई थियो ।

सहभागिहरुले निष्पक्ष एवं ईमानदारी पूर्वक आफ्नो अधिकारको प्रयोग गरी हरेक निकायलाई पारदर्शी बनाउनुको साथै जनता र राज्यबीच दूरी घटाउन निरन्तर प्रयासरत रहने बताए ।

ग्लोबल मधेशी एसोसिएशनको सहयोग र राष्ट्रिय सूचना आयोगको समन्वयमा संजालले गरेको एकदिने तालिम गोलबजारस्थित अतिथि सदनको सभाहलमा संचालन भएको थियो । कार्यक्रममा लक्ष्यभन्दा पनि बढी सर्वसाधारणको सहभागिता रहेको संजालले जनाएको छ । यस तालिमबाट आम नागरिकमा सूचनाको हक स्थापित हुने संजालको विश्वास छ ।

तालिम लिएका सबैलाई प्रमाण–पत्र प्रदान गरिएको थियो भने कार्यक्रममा अतिथिका रुपमा अपस्थित सबैलाई गम्छा ओढाई सम्मान समेत गरिएको थियो ।

संजालले यसअघि जिल्ला स्तरीय हाजिरी जवाफ प्रतियोगिता, छात्रवृत्ति कार्यक्रम लगायतका विभिन्न कार्यक्रम समेत गरिसकेको छ । संजाल सिरहा जिल्लामा विभिन्न सामाजिक कार्यहरुमा निरन्तर सक्रिय रहेको छ ।