मिसाबट गरेको भन्दै १२ लाख ५१ हजार जरिवाना, ४८ लाखको तमसुक

न्यूज ब्यूरो, जनकपुरधाम । धनुषामा एक व्यापारीले मल खाद्यमा मिसाबट गरेको भन्दै १२ लाख ५१ हजार रुपैयाँ जरिवाना गरिएको छ ।

धनुषाको धनुषाधाम नगरपालिका वडा नं. ७ किसानपुरमा अशोक जेनेरल स्टोरका सँचालक २८ बर्षिय सँतोष साहलाई स्थानीयहरुले १२ लाख ५१ हजार जरिवाना गरेको तथ्य सार्वजनिक भएको छ ।

सोमबार विहान करिब ९ बजे स्थानीय एक किसानले सँतोष सँचालन गर्दैै आएका अशोक जेनेरल स्टोरबाट पोटास खरिद गरेका थिए । उनले जाईम १० किलो , जिँक १ किलो , डिएपी मटिया १० किलो, पोटास ३ किलो खरिद गरेको थियो । घर लगेर खोलेपछि उनलाई मलमा मिसाबटको शंका लागेको आधारमा स्थानीय छिमेकी श्रवण साहलाई जानकारी गराएको थियो ।

यता, श्रवणले समेत मलमा मिसाबट हेरेपछि उनले समेत सँतोषको पसलबाट ४३ किलो पोटास नामक मल खरिद गरेका थिए । मल खरिद गरेर चेकजाँच गरेपछि बालुवा र नुन भेटाएको खुल्यो । स्टीलको भाडोमा प्वाल पारी मल राखेर पानी हालेको थियो । पोटास पानीमा गल्ने भएपनि बालुवा भएको कारण सबै बालुको मात्रा एक तर्फ भएपछि पसल सँचालक सँतोषलाई स्थानीयहरुले हातपात समेत गरेको थियो ।

हातपातबाट पनि सन्तुष्ट नभएका स्थानीय गाउँलेहरुले उनलाई पञ्चायत बोलाएर बल जबरदस्ती १२ लाख ५१ हजार रुपैयाँको जरिवाना तोकिएको पसल सँचालक साहले दाबी गरे । धनुषाधाम नगरपालिका वडा नं. ५ उत्तरबाली टोल नौसय विघा घर भई विगत देखि नै किसानपुरमा व्यापार गर्दै आएको सँतोषलाई गाउँलेहरुले १२ लाख ५१ हजारको जरिवाना तोक्दै ४८ लाखको कागज बनाएको साहले फोन मार्फत जानकारी दिए ।

उनले , "मात्र ३/४ दिनदेखि मिसाबट गरेको छु , एक क्वीन्टलको बोरामा ३० किलो बालुवा, ४० किलो नुन, अल्मुनियम सल्फेट १० किलो, १ किलो किनमिक केमिकल मिसाबट गरेर पोटास बेचेको थिए । तर केही जनाले मात्र केही किलो लिएका थिए ।" सोधपुछको क्रममा बताए । (यसको भिडियो दस्ताबेज सुरक्षित छ ।)

घटनाको बारेमा प्रमुख जिल्ला अधिकारी (सिडिओ) प्रेम लाल लामिछानेले केही मात्र जानकारी आएको र यसबारे बुझन पठाएको तथा विस्तृत बुझेपछि मात्र केही भन्न सकिने बताए ।

यता, जिल्ला प्रहरी कार्यालय धनुषाका एपसी गोविन्द थपलियाले घटनाबारे जानकारी नभएको तथा अनुसन्धानको लागि प्रहरी टोली पठाउने बताए ।

धनुषाधाम वडा नं. ७ का वडाध्यक्ष हेम नारायण यादवले भने दण्ड जरिवाना गरेको बारे केही जानकारी नभएको तथा स्थानीय स्तरमा आएर बुझन प्रतिक्रिया दिए । उनले भने, "दण्ड जरिवाना सम्बन्धी मलाई केही जानकारी छैन । यहाँ गाउँमा आएर विस्तृत जानकारी लिनुस् ।"

जरिबानाको रकमको लागि स्थानीय शिवशंकर साह र ज्ञान यादवको नाममा २४/२४ लाख रुपैयाँको तमसुक बनाइएको जानकारी छ । १२ लाख ५१ हजारको ४ गुणा गरी तमसुक बनाइएको हो । यद्यपी, उनीहरुले यस्तो केही पनि नभएको प्रतिक्रिया दिएका छन् । जरिबाना बारे अनभिज्ञता जनाए ।

मिसाबट गरेको खण्डमा कानुनी कारवाही र प्रक्रिया भएपनि गाउँलेहरुले यत्रो रकम जरिबाना तोक्नु कहाँको कानुन हो र कसरी गर्न सकिन्छ भन्ने जिज्ञासामा ईलाका प्रहरी कार्यालय ढल्केबरका प्रहरी नीरिक्षक सरोज रायले आफूलाई केही जानकारी नभएको बताए ।

पञ्चायत हुँदा समय ढल्केबरको प्रहरी टोली समेत उपस्थित भएपनि आफूलाई केही जानकारी नभएको प्रतिक्रिया दिए । यता, एसपी थपलियाले यस्तो कार्यमा सँलग्नलाई कानुनको दायरामा ल्याएर कारवाही गर्ने बताए ।