कर्जन्हा नगरपालिकाका मेयरको गाडी उपर खुकुरी प्रहार

न्यूज ब्यूरो, सिरहा । सिरहाको कर्जन्हा नगरपालिकाका मेयर गंगा पासमानको गाडी उपर खुकुरी प्रहार भएको छ । कर्जन्हा नगरपालिका ११ बगहामा रहेको नगरपालिका कार्यालयबाट बाहिरीने क्रममा गाडीमा खुकुरी प्रहार भएको हो ।

ना १ झ १६३९ नम्बरको स्कारपियो गाडीको खुकुरी प्रहारबाट पछाडीको सिसा फुटेको छ । मेयर पासमान सुरक्षित रहेको छ ।

लामो समयदेखि केन्द्र विवाद चल्दै आएको कर्जन्हा नगरपालिकाकाे कार्यालयको केन्द्र सम्बन्धमा आज परिषद् डाकिएको थियो । परिषद् सकेपश्चात् बाहिरिएपछि स्कारपियाेमा खुकुरी प्रहार संगै ढुंगामुढा समेत भएको मेयर पासमानले न्यूज ब्यूरोसँग भने । यता, स्थानीयले भने खुकुरी प्रहार नभई ढुंगामुढा भएको दाबी गरेका छन् ।

नगरपालिकाको केन्द्र सम्बन्धमा मुद्दा परेपछि अदालतले बगहामा नगरपालिकाको कार्यालय राख्ने आदेश दिएको थियोे । तर, मेयर पासमान भने नगरपालिकाको कार्यालय कर्जन्हामा नै राख्ने अडानमा थिए ।