स्वास्थ्यकर्मीहरु ६ महिनादेखि तलब पाएन , पर्वमा निमुखा ?

न्यूज ब्यूरो, महोत्तरी । महोत्तरीको सम्सी गाँउपालीकामा कार्यरत स्वास्थ्यकर्मी विगत छ महिनादेखी मासिक रुपमा पाउने तलब पाएक छैनन् ।

गत बैशाख महिनादेखि त्यहाँ कार्यरत स्वास्थ्यकर्मीहरु समयमै तलव नपाएपछि नजिकिदै गएको पर्व तिहारहरुमा निमुखा नै बस्ने भनेर प्रश्न तेर्साएको छ । समयमै तलब उपलब्ध गराईदिनको लागि यहाँका स्वास्थ्यकर्मीहरु बारम्बार गाँउपालिकाको कार्यालयमा जानकारी गराउँदा समेत कुनै सुनवाई हुन नसकेको स्वास्थ्यकर्मी राघवेन्द्र यादवले जानकारी दिनुभयो ।

गत भदौ २० गतेको दिन गाँउपालिकासँग भएको लिखित सहमति कार्यान्वयन हुन नसकेको स्वास्थ्यकर्मी यादवले जनाउनुभयो । एक हप्ताभित्र सम्पूर्ण स्वास्थ्यकर्मीहरुको तलब उपलब्ध गराउने भएको सहमति कागजको खोस्टोमा परिणत भएको छ ।

कार्यालयका लेखापाल कौशल किशोर बछारले यस आर्थिक बर्षको बजेटमा स्वास्थ्यकर्मीहरुको बजेट नभएकोले समयमै तलब दिन नसकेको बताउनुभयो । प्रशासकीय अधिकृत संतोष कुमार शर्माले दिएको जानकारी अनुसार, हतार हतारमा बजेट तर्जूमा गरिएकोले कागजी प्रक्रिया नयाँ भएकोले राम्ररी मिलाउन नसकेकोे जसले गर्दा स्वास्थ्यकर्मीहरुले समयमै तलब पाउन नसकेको स्वीकार गर्नुभयो ।

५ वटा स्वास्थ्य चौकी रहेको सम्सी गाँउपालिकामा ३५ जना स्वास्थ्यकर्मीहरु कार्यरत रहेका छन ।