पुलचोक कोल्डस्टोरसम्म सडकभित्रको घर, टहरा हटाउन सूचना

न्यूज ब्यूरो, जनकपुरधाम । जनकपुरधामको पुलचोकदेखि कोल्ड स्टोरसम्ममा सडकभित्र पर्ने घर, टहरा, पर्खाल हटाउन १५ दिने सूचना जारी गरिएको छ ।

जनकपुरधाम उपमहानगरपालिका कार्यालयले एक सूचना जारी गर्दै पूलचोकको पशुपति आइरन स्टोरदेखि कोल्डस्टोरसम्मको जम्मा १६ मिटरको सडक निर्माण कार्य हुने भएकोले १५ दिनभित्र सडकको केन्द्रदेखि ८ मिटर दायाँ र ८ मिटर बायाँमा पर्ने घर, टहरा, पसल, पर्खाल आदी समयमै हटाउन सूचना जारी गरेको छ ।

जारी गरेको १५ दिने सूचनामा समयसीमा भित्र घर, टहरा नहटाए जुनसुकै बेला नगरपालिकाले भत्काउन सकिने चेतावनी समेत दिइएको छ ।

हुलाकी राजमार्ग आयोजना कार्यालय धनुषा अन्तर्गतको २०७५/५/२०, च.न. ७५ को पत्रानुसार त्यस कार्यालयबाट निर्माण भईरहेको जनकपुरधाम यदुकूहा सडकमा पर्ने जनकपुरधामको शुभचोकस्थितको पशुपति आइरन स्टोर देखि कोल्ड स्टोरसम्मको सडकभित्रको घर, टहरा, पर्खाल आदी हटाउन सूचना जारी गरेको हो ।