औरही नपामा सार्वजनिक सुनुवाई तथा सामाजिक परीक्षण सम्पन्न

न्यूज ब्यूरो, महोत्तरी । महोत्तरीको औरही नगरपालिकामा सार्वजनिक सुनवाई तथा सामाजिक परिक्षण कार्यक्रम सम्पन्न भएको छ । नगरपालिकमा कर वृद्धि र भ्रष्टाचार भएको भन्दै फैलिएको भ्रमलाई चिर्न तथा तमाम नगरबासीलाई बुझाउन सोनामाईको प्रांगनमा उक्त कार्यक्रम सम्पन्न भएको हो ।

जनतामा सृजना हुन गएको भ्रमका कारण नगरपालिका प्रमुख सुनिल कुमार यादव आलोचित भइरहेका बेला सार्वजनिक सुनुवाई तथा सामाजिक परिक्षण कार्यक्रम गरिएको छ ।

कार्यक्रममा नगरप्रमुख यादवले सम्पूर्ण नगरबासीलाई भ्रममा नपर्न आग्रह गरेका छन् । नगरपालिकाले जनताको हित विपरित नजाने प्रतिवद्धता पनि उहाँले जनाउनुभयो ।

कार्यक्रमको प्रमुख अतिथिका रूपमा रहनुभएका नेपाली कांग्रेसका जिल्ला सभापति महेन्द्र कुमार राय यादवले पनि अरुको झुठो अपवाहमा नपर्न सबैलाई आग्रह गर्नुभयो । उहाँले नगर विकासका लागि पार्टीबाट माथि उठेर लागे मात्र विकास र समृद्धि सम्भव रहेको बताउनुभयो ।

कार्यक्रममा नेकपा माओवादीका नेता रामबाबु चैधरी र नारेन्द्र यादवले जनतालाई जन्म दर्ता, बिवाह दर्ता, नागरिकता सिफारिस लगायतका सेवाहरुमा कर छुट गर्न नगर नेतृत्वसँग माग गरेका छन् ।

सोही कार्यक्रममा नगरपालिकाका कार्यकारी अधिकृत गिरिराज मिश्रद्धारा आ.ब २०७५ र ७६ को निति तथा कार्यक्रम प्रस्तुत गरिएको छ ।

कार्यक्रममा नेपाल पत्रकार महासंघका उपाध्यक्ष नागेन्द्र कुमार कर्ण, संघीय समाजवादी फोरम नेपालका नेता गगा प्रसाद यादव, राजपा नेपालका नेता दिनेश यादव, नेपाली काङ्ग्रेसका नेता बिनय कुमार झा, नेकपाका नेता रामबाबु चैधरी, नरेन्द्र यादव लागायत सम्पूर्ण वडा अध्यक्षहरु तथा नगरबासीहरुको सहभागिता रहेको थियो ।