धनुषाको शहिदनगर नगरपालिकामा प्राविधिक विद्यालयको घोषणा

न्यूज ब्यूरो, जनकपुरधाम । धनुषाको शहिदनगर नगरपालिकामा प्राविधि शिक्षालयको घोषणा गरिएको छ ।

विज्ञान प्रविधि तथा शिक्षामन्त्री गिरिराजमणि पोखरेलले धनुषाको शहिदनगर नगरपालिकामा प्राविधिक विद्यालय सँचालन गर्ने घोषणा गर्नुभएको नगरका मेयर उदय कुमार बरबरियाले जनाए । विहिवार आयोजित नगर स्तरीय शिक्षा विकास सम्बन्धी अन्तरक्रिया कार्यक्रममा नगरपालिकाले प्रस्तुत गरेको शिक्षालयको योजनापछि मन्त्री पोखरेलले प्राविधिक शिक्षालयको घोषणा गरेका हुन् ।

कार्यक्रममा मन्त्री पोखरेलले देशकै कान्छो मेयर भनिएको शहिद नगरका प्रमुख उदय कुमार बरबरिया यादवलाई मिशन र भिजनका साथ शिक्षालयको काममा अघि बढ्न सुझाव दिएका थिए । नगरप्रमुख बरबरियाको अध्यक्षतामा भएको कार्यक्रममा उनले आफुले प्राविधिक शिक्षालयको लागि आवश्यक योजना र रणनीति सहित छिट्टै मन्त्रालय पेश गर्ने दाबी समेत गर्नुभयो । ।

उनले नगरका विद्यार्थीहरुलाई आफ्नै घरमा बसेर सिप र रोजगारी मुलक शिक्षाका लागि आफु तत्पर रहेको बताए । यस्तै, शहिद सूर्यनाथ रानको ३२ औँ स्मृति सभालाई सम्बोधन गर्दै मन्त्री पोखरेलले संविधानको लक्ष्य अनुरुप सबै जनतालाई सुखी र समृद्ध बनाउन एउटा मानिस धनी र अर्को गरिब भएर समृद्धि प्राप्त नहुने बताउँदै देशको जनता समृद्धिको लागि प्रविधियुक्त शिक्षा आवश्यक भएको बताउनुभयो ।

विश्वको इतिहासमा संघीयताको कार्यान्वयको पक्ष अत्यन्त जटिल भएकोले देशलाई संघीयतामा विकास गर्न एक शक्तिशाली पार्टीको आवश्यकता अनुरुप नेकपाको निर्माण भएको बताउनुभयो ।

शहिदनगरपालिका यदुकूहामा आयोजित नगर स्तरीय शिक्षा विकास सम्बन्धी अन्तरक्रिया कार्यक्रममा शिक्षा मन्त्री पोखरेलले भने, ‘संविधान भनेको जनता परिवर्तनको सुत्र हो, जनताको स्वार्थसंग गाँसिने विषयवस्तु भनेको संविधान हो, यद्दि त्यो जनताको जनजीविकासंग जोडिदैन भने, त्यो कागजको खोष्टा मात्र हो ।’

शिक्षामन्त्री पोखरेलले यसै वर्षमा मुलुकमा ३ लाख १३ हजार बालबालिका विद्यालय बाहिर रहेकोमा ४९ प्रतिशत विद्यार्थी प्रदेश २ का रहेकोले अब सबैको लागि अनिवार्य शिक्षा, निःशुल्क शिक्षा प्रणाली ल्याई समृद्धिसंग शिक्षालाई जोड्न लागिएको बताए । उनले शिक्षालाई श्रम, सिप, उत्पादन, रोजगारी र समृद्धिसंगै जाडेर अघि लगिए मात्र जनतामा परिवर्तनको आभास दाबी गर्नुभयो । उनले सरकार निर्माणको भएको देखि हाल सम्म ६ महिनाको अवधिमा २ सय सामुदायिक विद्यालयलाई प्राविधि शिक्षासंग जोडिएको बताउनुभयो ।

उनले १२ कक्षा बढेका हरेक विद्यार्थीलाई अनिवार्य एउटा सिप सिकेको हुनुपर्ने बताउँदै शिक्षामा जोडका हाल ४१ जिल्लामा १३ लाख बालबालिकालाई दिवास खाजाको व्यवस्था गरेको र बाकी ७५ वटै जिल्लामा यसै शैक्षिक सत्रमादिवा खाजाको व्यवस्था गर्न लागिएको बताउनुभयो ।