डा. सिके राउतका तीन कार्यकर्ता अदालतबाट साधारण तारेखमा रिहा !

न्यूज ब्यूरो, बर्दिया । डा. सिके राउत नेतृत्वको स्वतन्त्र मधेस गठबन्धनका तीन कार्यकर्तालाई अदालतले साधारण तारेखमा रिहा गर्ने आदेश दिएको हो ।

प्रहरी हिरासतमै मृत्यू भएका गठबन्धनका नेता राम मनोहर यादवसँगै पक्राउ गरिका यी तीनैजनालाई अदालतले साधारण तारेखमा रिहा गर्ने आदेश दिएको जनाइएको छ ।

गत भदौ ७ गते वर्तमान स्वास्थ्यमन्त्री उपेन्द्र यादव एवम् संघीय समाजवादी फोेरम नेपालका अध्यक्ष उपेन्द्र यादवलाई कालो झण्डा देखाएपछि बर्दियाबाट राम मनोहर यादवसँगै पक्राउ परेका ईर्फान शेख, राजीतराम वर्मा र हरपाल सिँहलाई सोमबार रिहा गरिएको छ ।

बर्दिया प्रहरीले राज्य विरुद्धको अपराध मुद्दामा चारै जनालाई पक्राउ गरी प्रहरी हिरासतमा राखिएको थियो । प्रहरी हिरासतमै गत भदौ १४ गते स्वतन्त्र मधेस गठबन्धनका नेता राम मनोहर यादवको मृत्यू भएको हो ।

यता, उनीहरुको रिहाईको लागि उच्च अदालत नेपालगँजमा बन्दी प्रत्यक्षिकरणको रिट दायर गरिएकोमा अदालतले खारेज गरेको थियो । प्रहरी हिरासतकै क्रममा मृत्यू भएका राम मनोहर यादवको शव अहिले पनि टिचिँग हस्पिटल महाराजगँजमा राखिएको छ भने अहिलेसम्म पोष्टमार्टम हुन सकेको छैन ।

फोरमका अध्यक्ष एवम् स्वास्थ्यमन्त्री उपेन्द्र यादवलाई कालो झण्डा देखाएपछि उनकै आदेशमा प्रहरी हिरासतमा राखिएको र हिरासतमै मृत्यू भएपछि यादव सहित प्रहरी प्रशासन विरुद्ध समेत तराई मधेसको विभिन्न जिल्लामा नियमित प्रर्दशन र दोषीलाई कारवाहीको माग गरिएको छ ।