फेरी सप्तरीमा ट्रकले लियो दुई जनाको ज्यान !

न्यूज ब्यूरो, सप्तरी । पूर्व–पश्चिम राजमार्गअन्तर्गत सप्तरीको सम्भुनाथमा ट्रकको ठक्करबाट दुई जनाको मृत्यु भएको छ ।

आइतबार साँझ पश्चिमबाट पूर्वतर्फ जाँदै गरेको ना २ ख ३००१ नम्बरको ट्रकले विपरीत दिशाबाट आउँदै गरेको बा ५० प ६००० नम्बरको मोटरसाइकललाई ठक्कर दिँदा मोटरसाइकल चालक झापाको मेची नगरपालिका–६ बस्ने ३४ वर्षीय अर्पण तामाङको घटनास्थलमै मृत्यु भएको जिल्ला प्रहरी कार्यालय सप्तरीले जनाएको छ ।

त्यस्तै, मोटरसाइकलको पछाडि सवार सोही ठाउँका २८ वर्षीय अल्केश थापाको पनि मृत्यु भएको छ । उनको भने उपचारको लागि राजविराजस्थित गजेन्द्र सिंह सगरमाथा अञ्चल अस्पतालमा ल्याउने क्रममा बाटोमा नै मृत्यु भएको जिप्रका सप्तरीले जनाएको छ ।

विगत केही दिन यता राजमार्ग सहित अन्य लोकमार्ग समेत ट्रिपरको आतँक समेत बढदै गएपनि ट्राफिकले त्यसको व्यवस्थापन गर्न सकिएको छैन । राजमार्गमा छेउमा पेलेर तथा अत्यधिक गतिमा ट्रक तथा ट्रिपर चलाउने गरेको कारण दुर्घटना बढी हुने गरेको देखिएको छ ।