भदौ ३१ देखि पटना–जनकपुरधाम बस सेवा सञ्चालन हुँदै

न्यूज ब्यूरो, जनकपुरधाम । लामो समयदेखि अन्यौलमा रहेको पटना–जनकपुरधाम र बोधगया–काठमाण्डु बस सेवा सञ्चालन हुने भएको छ ।

प्रदेश २ को अस्थायी राजधानी जनकपुर र भारत विहार राज्यको राजधानी पटना जोड्ने पटना–जनकपुरधाम र बोधगया–काठमाण्डु बस सेवा सञ्चालन हुन लागेको हो ।
भदौ ३१ गते प्रदेश २ का मुख्यमन्त्री लालबाबु राउतले हरियो झण्डा देखाएपछि औपचारीक रुपमा पटना–जनकपुरधाम बस सेवा सञ्चालन हुने जनकपुर अञ्चल बस व्यवसायी संघका अध्यक्ष मनोज चौधरीले जानकारी दिएका छन् ।

त्यसैगरि २८ भदौमा विहारका मुख्यमन्त्री नितिश कुमारले पटनामा हरियो झण्डा देखाइ जनकपुरको लागि बसलाई विदा गर्नेछन् । जनकपुरबाट छुट्ने बस सीतामढी, मुजफ्फरपुर हुँदै पटना जाने रुट निर्धारण गरिएको छ । त्यस्तै काठमाडौँबाट छुट्ने बस बीरगञ्ज, रक्सौल, मुजफ्फरपुर, पटना हुँदै बोधगया पुग्ने बताइएको छ ।

जनकपुरबाट करिब २ सय ७ किलोमिटर दुरी रहेको पटनासम्म बस सञ्चालन गर्न नेपालतर्फबाट काठमाण्डौस्थित स्वयंभु मञ्जुश्री यातायात प्रा।लि। र भारततर्फबात विहार सरकारको विहार पारवहनले जिम्मा पाएको छ ।

जनकपुरबाट बिहान ७ र ९ बजे तथा राति ८ बजे र पटनाबाट अपरान्ह ३ बजे, बिहान ४ बजे तथा राति ९ बजे समय प्रस्ताव गरिएको छ । यसैगरी काठमाण्डौ र विहारको बोधगयासम्म पनि बस सेवा सञ्चालन हुन गइरहेको बताइएको छ ।

काठमाण्डौबाट छुट्ने बस बीरगंज, रक्सौल, मुजफ्फरपुर, पटना हुँदै बोधगयासम्म पुग्ने छ ।
भारतीय प्रधानमन्त्री नरेन्द्र मोदी सन् २०१४ मा सार्क सम्मेलनमा सहभागी हुन आएको बेला जनकपुर–पटना बससेवा सञ्चालन गर्ने घोषणा गरेका थिए ।

पछिल्लो पटक बिमस्टेक सम्मेलनमा सहभागी हुन पुनः नेपाल पुगेका उनले उक्त घोषणा कार्यान्वयन गर्न सम्झौता गरेका छन् । दुई मुलुकबीच चारवटा बस सञ्चालन गर्ने सम्झौता रहेपनि तत्काल दैनिक १÷१ बस सञ्चालन हुने अध्यक्ष चौधरीले बताए ।