कृष्णाष्टमीमा दुहबीको रथयात्रा, हजारौँ श्रद्धालुको सहभागिता (फोटो फिचर )

न्यूज ब्यूरो, सुनसरी । सुनसरीको दुहवीमा नेपालको सांस्कृतिक धरोहरहरु मध्ये हिन्दु संस्कृतिको "श्रीकृष्णजन्माष्टमी महोत्सव" भव्य रुपमा मनाइएको छ ।

श्रीकृष्णजन्माष्टमी पर्व हिन्दू धर्मावलम्बीहरुले देश विदेशमा भगवान कृष्णको जन्मेका दिन धार्मीक पर्वको रुपमा मनाएका छन । दुहवीमा स्थापित कृष्ण मन्दिरहरुमा मानिदै आएको श्रीकृष्णजन्माष्टमी पर्व सदाझैं भव्य रुपमा आयोजना गरियो ।

श्रीकृष्ण जन्मोत्सव मनाउन अवेर रात सम्म लाखौं भक्तजनहरुको घुइचो लागेको थियो । सोमवार कृष्णजन्माष्टमी समापन अघि सधैंझैं रथयात्राको आयोजना गरिएको थियो । रथयात्रा वेलुका २ः३०बजे देखी दुहवी ६ स्थित कृष्ण मन्दिरबाट शुरु भएको थियो । रथयात्रामा दुहवी नगरपालिका, बुढीगंगा गाउँपालिका र गढी गाउँपालिका लगायत ठाउँबाट आएका हजारौ हजारौं भक्तजनहरुले सोनापुर र मोरङको नेमुवा सगै दुहवी बजार परिक्रमा गरेका थिए ।

धार्मीक आस्था अनुसार भगवान कृष्णको रथयात्रामा सहभागी भई रथको डोरी तान्नु धार्मिक पूण्यकार्य गरे बराबर हुने विश्वास गरिन्छ । त्यसैले धार्मीक आस्थावानहरुको ठूलै भीड रथयात्राको डोरी तान्ने कार्यमा देखिने गरिन्छ ।

यसै आस्थाका कारण शारिरिक रुपमा अशक्त, बृद्ध, वृद्धाहरु रथयात्राको डोरी छुनका लागि मात्र पनि रथयात्रामा सहभागी हुने गर्दछन् । कृष्ण जन्मष्टमी कृष्णको बाललिलाको खण्डको विशेष पर्व भएकोले पनि जन्माष्टमीमा बालकृष्णको दर्शनका लागि श्रद्धालुहरु आकर्षित हुने धार्मीक विश्वास छ ।

रथयात्रामा ओम शान्ति , नेवार समुदायको भेषभुषा सगै लाखै ,किरात आयखा चन्डि,पौदार सेवा समाज ,मार्वाडि मञ्च ,नव युवा कल्ब ,दुहबी जेसिज ,रौनियार समाज, बैस्य समाज लगायताका विभिन्न झाँकीका साथै भजनकीर्तन मण्डलीले रथयात्रालाई सङ्गीतमय बनाएको थियो ।

हिन्दु धर्मालम्बि बाहुल्य गाउँ गाउँमा कृष्णजन्मष्टमी पर्वलाई धूमधामका साथ मनाउने चलन छ । दुहवीमा शनिबारदेखिनै विविध भगवान कृष्णको चरित्रमा आधारित झाँकी प्रदर्शन गरेर कार्यक्रमको सुरु गरिएको थियो । आइतबार श्रीकृष्ण महाभिषेक पूजा प्रार्थना गरिएको थियो ।

सन्ध्याकालीन समयमा आइतबार आरती, भजन, कीर्तनसँगै मध्यरात्रीमा कृष्णको जन्मपूजन गरिएको थियो । कृष्णलाई भगवानको रुपमा पूजा अर्जना गर्ने परम्परा अनुरुप जन्म मध्यरात्री १२ बजे भएको पुराण कथनका आधारमा विशेष गरेर मध्यरात्रीसम्म जाग्राम बसी पूजा आजा गर्ने प्रचलन रही आएको छ ।

विशेष गरेर कृष्ण मन्दिरहरुमा झनै विशेष धुमधामका साथ मेला लाग्ने गर्दछ । भाद्रकृष्ण अष्टमीको रात्रीलाई कृष्णको जन्मभएको मानी त्यसैको भोलीपल्ट रथारोहण गरी रथयात्राका साथ बजार परिक्रममा गर्ने प्रचलन रहेको हो ।

दुहवीमा रथयात्रासँगै सन्ध्याकालीन संकीर्तन, आरतीसहित महाप्रसाद वितरण गरेर कृष्ण महाष्टमी विशेष पूजागरी समापन गरीनेछ । प्रदेश १ सरकारले रथयात्राका दिन प्रदेश १ मा सार्वजनिक बिदाको घोषणा गरेको थियो।