शिशु हत्या काण्ड : महोत्तरीको औरहीमा 'अपराधीलाई फाँसी दे' !!!

न्यूज ब्यूरो, नेपाल । ९ महिने शिशु (बालिका) लाई अपहरण तथा दुश्कर्म पश्चात हत्या गरिएको विरोधमा महोत्तरीको औरहीमा आन्दोलन चर्किएको छ ।

९ महिने शिशु सोनाली चौधरीलाई एक अपरिचित व्यक्तिले खेलाउन लैजान्छु भन्दै निहुँमा दुश्कर्म गरी हत्या गरेर फालिएको अवस्थामा शव फेला परेको थियो । ९ महिने बालिकासँग भएको यस्तो घटना र अपराधिलाई समात्न प्रहरी प्रशासनले चासो नदेखाएको भन्दै औरही गाउँका सम्पूर्ण बालबालिका, बृद्ध, युवा, वयस्क आन्दोलनमा उत्रेका छन् ।

प्रहरी प्रशासन विरुद्ध स्थानीय हजारौँ महिलाहरु "सोनालीलाई न्याय दे, अपराधीलाई फाँसी !" लेखिएको प्लेकार्ड सहित सडक धुँवा धुँवा गरिएको छ । स्थानीय प्रशासनले सोनालीको हत्याराको पहिचान सिसिटीभी क्यामेरा फुटेजमा देखिएपनि अहिलेसम्म पक्राउ गर्न नसकिएको भन्दै विरोधमा जनसागर ओर्लिएको छ ।

गत आईतबार साँझ सोनालीलाई अपहरण शैलीमा लगेर दुश्कर्म गरेको बुझिएको छ, सोमबार दिउँसो सोनालीको शव भँगहा नगरपालिका वडा नं. ७ स्थितको एक आँप बगैचाँ नग्न फालिएको अवस्थामा फेला परेको थियो ।