सामाजिक सञ्जालमा धमाधम बन्न थाले मेयर र वडाध्यक्ष, फेसबुकमै निर्वाचित !

वडाध्यक्षको अवस्था झन् रोचक छ। वडामा उम्मेदवारी दिने व्यक्ति आफैंलाई थाहा नहुन सक्छ कि आफू उम्मेदवार हुँदैछु कि छैन। तर फेसबुकका समर्थकले भने वडाध्यक्ष बनाइसकेका हुन्छन्।

‘हाम्रो वडाको भावी वडाध्यक्ष।’ तस्बिरसँगै यस्तो लेखिएको पोस्ट देखिएपछि सम्बन्धित व्यक्तिले पनि सोच्नुपर्ने अवस्था आउँछ–‘अब टिकट माग्न पार्टी कार्यालय जाने कि फेसबुकको कमेन्टमै धन्यवाद दिने ?’

यस्तो सामाजिक सञ्जालको चुनावमा मतदाता चाहिँ आवश्यक पर्दैन। समर्थक भए पुग्छ।

मतपत्र चाहिँदैन, पोस्ट चाहिन्छ। निर्वाचन अधिकृत चाहिँदैन, एडमिन चाहिन्छ। मतगणना केन्द्र चाहिँदैन, कमेन्ट सेक्सन भए पुग्छ।

अनि परिणामका लागि निर्वाचन आयोगको सूचना पनि आवश्यक पर्दैन। ‘बधाई तथा शुभकामना’ लेखिएको एउटा पोस्ट पर्याप्त हुन्छ।

तर वास्तविक निर्वाचन फेसबुकमा हुँदैन। फेसबुकमा लोकप्रिय हुनु र जनताको मत पाउनु एउटै कुरा होइन। सामाजिक सञ्जालमा धेरै लाइक, कमेन्ट वा सेयर आउनु मतदाताको वास्तविक प्राथमिकताको आधिकारिक मापन पनि होइन।

स्थानीय निर्वाचनमा अन्ततः निर्णय गर्ने अधिकार सामाजिक सञ्जालका समर्थकलाई होइन, मतदातालाई हुन्छ। त्यसैले अहिले नै फेसबुकमा मेयर र वडाध्यक्ष बनाइहाल्ने हतार किन ? अझ ६ महिना बाँकी छ।

फेसबुकको निर्वाचनमा त मेयर भइसके। अब वास्तविक निर्वाचनको पालो आउँदा फेसबुकले आफ्नो ‘निर्वाचित मेयर’लाई टिकट पनि दिलाइदिन्छ कि फेरि नयाँ उम्मेदवार खोज्नुपर्छ, त्यो भने हेर्न बाँकी नै छ।

त्यतिन्जेल सामाजिक सञ्जालमा निर्वाचन जारी रहोस्।

पोस्टहरू बढिरहून्।, फोटो फेरिरहून्।, ‘भावी मेयर’ थपिँदै जाऊन्।, ‘भावी वडाध्यक्ष’ पनि कम नहुन्।, किनकि वास्तविक निर्वाचन आउनुअघि नै फेसबुकमा चुनाव जितिसक्नु पनि त एउटा उपलब्धि हो नि !

कम्तीमा फेसबुकको सरकारमा त उनीहरू निर्विरोध निर्वाचित भइसके।