पर्सामा पटका पड्काउँदा छर्रा लागेर ८ वर्षीय बालकको मृत्यु, तिहारमा परिवार शोकाकुल

न्यूज ब्यूरो, वीरगँज । पर्सामा पटका पड्काउने क्रममा छर्रा लागेर एक बालकको मृत्यु भएको छ ।

मृत्यु हुनेमा पकाहाँ मैनपुर गाउँपालिका–२, मधुबनी निवासी रामगुलाम सहनीका ८ वर्षीय छोरा कुन्दन सहनी रहेका छन् ।

सोमबार बिहान करिब ८ बजे आफ्नै घरअगाडि पटका पड्काउने क्रममा बालकको छातीमा पटाकाको छर्रा लागेको थियो । फलामको पाइपभित्र पटका राखेर पड्काउने क्रममा पाइपको दुवैतर्फबाट छर्रा निस्किँदा उनको छातीको बीच भागमा गम्भीर चोट लागेको प्रारम्भिक विवरणमा उल्लेख छ ।

गम्भीर घाइते भई बेहोस भएका बालकलाई तत्काल उपचारका लागि वीरगञ्जस्थित तराई अस्पताल लगिएको थियो । तर, चिकित्सकले बिहान करिब ८ः४५ बजे उनलाई मृत घोषणा गरेका थिए ।

जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक चक्रबहादुर मल्लले पटका पड्काउने क्रममा छातीमा छर्रा लागेर घाइते भएका बालकको उपचारका क्रममा मृत्यु भएको पुष्टि गरेका छन् ।

घटनाबारे थप अनुसन्धान भइरहेको प्रहरीले जनाएको छ ।

यस घटनाले चाडपर्वका बेला पटका तथा विस्फोटक पदार्थको प्रयोगले बालबालिकाको ज्यानसमेत जोखिममा पार्न सक्ने देखाएको छ ।