दुई पटक वडाध्यक्ष जितेका धनप्रसाद लामा गोलबजारको मेयर बन्ने तयारीमा

न्यूज ब्यूरो, सिरहा । गोलबजार नगरपालिका–३ निवासी धनप्रसाद लामाले आगामी २०८४ सालको स्थानीय तह निर्वाचनमा नगर प्रमुख पदमा उम्मेदवारी दिने घोषणा गरेका छन्। नेकपाबाट चुनावी मैदानमा उत्रिने तयारीसहित उनले आफ्नो दाबेदारी सार्वजनिक गरेका हुन्।

विद्यार्थी जीवनदेखि नै कम्युनिस्ट राजनीतिमा सक्रिय लामा स्थानीय राजनीतिमा परिचित नाम हुन्। उनी गोलबजार नगरपालिका–३ को वडा अध्यक्षमा दुई पटक निर्वाचित भई जिम्मेवारी सम्हालिसकेका छन्। वडा तहमा हासिल गरेको अनुभव र लामो राजनीतिक यात्रालाई आफ्नो प्रमुख शक्ति मान्दै उनले अब नगरको नेतृत्व गर्ने लक्ष्य अघि सारेका छन्।

लामाले आफूलाई नगर प्रमुखको स्वाभाविक दाबेदारका रूपमा प्रस्तुत गर्दै पार्टीले टिकट दिएर अवसर प्रदान गर्ने विश्वास व्यक्त गरेका छन्। तर, पार्टीले टिकट नदिए पनि आफ्नो राजनीतिक विकल्प बन्द नहुने उनको संकेत छ। उनले त्यस्तो अवस्थामा अन्य विकल्पबारे सोच्न बाध्य हुने बताएका छन्।

आगामी निर्वाचनका लागि केही आकांक्षीले अहिलेदेखि नै पार्टीको माथिल्लो तहमा पहुँच विस्तार गर्दै टिकट सुनिश्चित गर्न दौडधुप सुरु गरेको उनको टिप्पणी छ।

‘केही व्यक्तिहरू अहिलेबाटै टिकटको दौडमा लागेको देखिरहेको छु,’ लामाले भने।

दुई पटक वडा अध्यक्ष बनेर स्थानीय तहको अनुभव हासिल गरेका लामाले नगर प्रमुख पदमा दाबेदारी प्रस्तुत गरेसँगै गोलबजारको आगामी निर्वाचनमा उनको भूमिका चासोको विषय बनेको छ। निर्वाचन आउन अझै समय बाँकी रहे पनि लामाको घोषणाले नगरको राजनीतिक माहोलमा चुनावी चर्चा सुरु गराएको छ।