धनौजी गाउँपालिकामा लैंगिक हिंसा विरुद्ध १६ दिने अभियान सम्पन्न

न्यूज ब्यूरो, जनकपुरधाम । धनौजी गाउँपालिकामा सञ्चालन गरिएको लैंगिक हिंसा विरुद्ध १६ दिने अभियान विविध कार्यक्रमसहित सफलतापूर्वक सम्पन्न भएको गाउँपालिकाले जनाएको छ। अभियानको उद्देश्य समुदायमा शारीरिक, मानसिक, यौनिक तथा आर्थिक हिंसाका रूप पहिचान गर्दै तीव्र गतिमा बढ्दै गएको लैंगिक हिंसाबारे सचेतना विस्तार गर्नु रहेको थियो।

अभियानमा स्थानीय सरकारका प्रतिनिधि, महिला समूह, युवा क्लब, नागरिक समाजका सदस्य तथा विभिन्न संघ–संस्थाका प्रतिनिधिको सहभागिता रहेको थियो। सहभागीहरूले लैंगिक हिंसाका कारण, त्यसका प्रभाव तथा रोकथामका उपायबारे व्यापक जानकारी पाएका थिए।

विद्यालयतहमा आयोजना गरिएको विशेष सचेतना सत्रमार्फत बालबालिका, विशेषतः बालिकालाई सुरक्षित वातावरणमा शिक्षा र जीवनयापनका पक्षहरूबारे अभिमुखीकरण गरिएको गाउँपालिकाले जनाएको छ। विभिन्न र्याली तथा अन्तरक्रियात्मक कार्यक्रममा स्थानीय पुरुष, महिला र युवाको उल्लेखनीय भुमिका रहेको थियो।

गाउँपालिका अध्यक्ष, प्रमुख प्रशासकीय अधिकृत, वडा अध्यक्षहरू तथा सामाजिक कार्यकर्ताहरूले अभियानलाई नियमित कार्यक्रमका रूपमा अघि बढाउने प्रतिबद्धता व्यक्त गरेका छन्।

अधिकारवादी समूह तथा स्थानीय नेतृत्वका अनुसार अभियानले समुदायमा तत्कालीन सचेतना बढाएको मात्र होइन, सरकारी तथा गैरसरकारी निकायलाई लैंगिक हिंसा रोकथामका गतिविधिमा थप सक्रिय हुन प्रेरित गरेको छ। गाउँपालिकाले आगामी दिनमा यस विषयमा दीर्घकालीन र प्रभावकारी कार्यक्रम सञ्चालन गर्ने तयारी अघि बढाएको छ।