धनुषाका वडाध्यक्ष यादवलाई गोली हानेर हत्या आरोपमा एक प्रहरीसहित चार जना पक्राउ

न्यूज ब्यूरो, जनकपुरधाम । धनुषाको मिथिला बिहारी नगरपालिका वडा नम्बर ९ का वडाध्यक्ष विन्देश्वर यादवको गोली हानेर हत्या गरेको आरोपमा प्रहरीले चार जनालाई पक्राउ गरेको छ ।

पक्राउ पर्नेमा ३५ वर्षिय शम्भु कुमार यादव, ३० वर्षिय धर्मनाथ यादव,२८ वर्षिय पप्पू यादव र २८ वर्षकै मनोज कुमार यादव रहेका छन् । उनीहरू सोही वडाका हुन् ।

सोही वडाको अन्दुपट्टी बस्ने दुखी यादवको मृत्यु संस्कारको १० दिनको भोज ढिलो समयमा सुरु गरेको विषयलाई लिएर दुई पक्षबिच विवाद भएको थियो ।

झै–झगडा गर्ने क्रममा सोही ठाउँ घर भई जिल्ला प्रहरी कार्यालय सप्तरीमा कार्यरत प्रहरी सहायक हवलदार शम्भु कुमार यादव समेतले कटुवा पेस्तोलले वडाध्यक्ष यादवको छातीमा गोली प्रहार गरी घाइते बनाएका प्रहरीले जनाएको छ ।

उनीहरूको साथबाट पेस्तोल थान–१,गोलीको खोका–१ समेत बरामद गरी घटनामा संलग्नहरूलाई विभिन्न स्थानबाट पक्राउ गरी जिल्ला अदालत धनुषाबाट म्याद लिई थप अनुसन्धान भइरहेको प्रहरी नायव उपरीक्षक गणेश बहादुर बमले बताए ।