धनुषा प्रहरीको कर्मकाण्डः कमजोरी लुकाउन तीन निर्दोषलाई फँसाएर हिरासतमा लिएको आरोप

न्यूज ब्यूरो, जनकपुरधाम । धनुषा प्रहरीले आफ्नो कमजोरी लुकाउन गाउँका तीन निर्दोष किशोरहरुलाई फँसाएको आरोप परिवारजनले लगाएको छ ।

धनुषाको धनौजी गाउँपालिका वडा नं. २ धनौजीमा सोमबार राती करिब ११ बजे भएको चोरी घटनामा सँलग्न नै नरहेको तीन जना किशोरलाई फँसाएको आरोप उनका परिवारजनले लगाएका छन् ।

प्रहरी चौकी धनौजीको नाक अगाडी नै राती चोरी भएपछि बेइज्जतबाट बच्न प्रहरी चौकी धनौजीले तीन जना निर्दोष किशोरहरुलाई नियन्त्रणमा लिएर जिल्ला प्रहरी कार्यालय धनुषामा बुझाएको दुःखेसो पोखिएको छ ।

चोरी भएको राती तीनै जना सिसिटिभीमा देखिएको छ । चोरी भएको बाटो तर्फ गएको र ५ मिनेटमै पुनः फर्किएको देखिएको छ । उनीहरु राती ११ बजे गएको सिसिटिभीमा देखिएको छ । प्रहरी चौकी अगाडी रहेको दारु पसलमा चोरी भएको छ । केही थान बियर खाएको र अण्डा फ्राई गरेर खाएको प्रहरीले जनाएको छ । ५ मिनेटको अन्तरालमा बियर खाँदै, अण्डा समेत फ्राई गरेर खान नसक्ने बताउँदै परिवारजनले कुनै समान, वस्तु बरामद नभएपनि छोरालाई भित्र हालेको आरोप लगाएको छ ।

यता, प्रहरीले भने उनीहरु आरोप स्वीकार गरिसकेको प्रतिक्रिया दिएको छ भने पक्राउ परेका किशोरहरुले डर धम्की देखाएर आरोप स्वीकार गर्न लगाएको बताएका छन् । आरोप स्वीकार गरे छाडिदिने भन्दै किशोरहरुलाई आरोप स्वीकार गर्न लगाएर जिल्ला प्रहरी पठाईदिएको आरोप छ ।

प्रहरीचौकी धनौजीको करिब ५० मिटर कै दुरिमा ४ ठाउमा चोरी भएको छ। घटनाको प्रकृति हेर्दा पेशेवर चोरले सईन काटेर चोरी गरेको देखिएको छ । उनीहरुलाई चेकजाँच गरिएपनि केही नेभटाएको, शरिरमा कुनै घाउ नदेखिएको भएपनि उनीहरुलाई समातेर लगेको परिवारजनको आरोप छ ।

प्रहरी चौकी धनौजीका असई हर्क बहादुर श्रेष्ठले जनप्रतिनीधिको उक्साहटमा आएर उनीहरुलाई पक्राउ गरी जिल्ला पठाएको बताईएको छ । यता, जिल्ला प्रहरी कार्यालय धनुषाले अनुसन्धानमै रहेकोले केही भन्न नसक्ने बताएको छ ।