समानुपातिक साँसदको लागि खुल्लमखुल्ला सहयोग आह्वान गरेका थियौँ, भ्रम होईनः डा. सिके राउत

न्यूज ब्यूरो, जनकपुरधाम । जनमत पार्टीका अध्यक्ष डा. सिके राउतले चुनावमा समानुपाति साँसदको सूचिमा नाम राख्न पार्टीको लागि आर्थिक सहयोगको खुल्लखुल्ला आह्वान गरेको बताएका छन् ।

मिडियाहरुमा पार्टीका निलम्बित कोषाध्यक्ष सुरेन्द्र नारायण यादवमाथि आर्थिक चलखेल र ठगी आरोपको मुद्दा लागेपछि कारवाहीमा परेका केही नेताहरुले भ्रम छरेको स्पष्ट पारेका छन् ।

डा. राउतले चुनावी समयको एक भिडियो पोष्ट गर्दै जनमत पार्टीले पार्टी चलाउन, आमसभा र विभिन्न यात्रा गर्न, प्रचार प्रसार गर्न र निर्वाचन खर्च जुटाउन आर्थिक सहयोगको लागि केन्द्रीय समितिको बैठकबाट पारित गरी खुल्लमखुल्ला आह्वान गरेको स्पष्ट पार्दै केही मिडियाहरुमा प्रकाशित भ्रममा नपर्न आग्रह गरेका छन् ।

उनले लेखेका छन्–“सोही अनुरूप केहीले १५ लाख, त केही २५–३० लाख कुनै पद पाए पनि नपाए पनि फिर्ता नहुने गरी आर्थिक सहयोग गरेको थियो जसबाट खर्च व्यवस्थापन गरिएको थियो। समानुपातिक पदका उम्मेदबारले पनि निर्वाचन खर्च मात्रै तिरेका होइनन्, समग्र पार्टीको समग्र गतिविधिलाई नै गरेको आर्थिक सहयोग हो।”

सो कुरा डा. सी. के. राउतले २०७९ को निर्वाचन पश्चात् तत्कालै दिएको अन्तर्वार्तामा सोधिएको 'पार्टीको र निर्वाचनको खर्च कहाँबाट ल्याउनु भयो' भन्ने प्रश्नको जवाबमा सुन्न सकिन्छ।