आँशु यादव हत्या प्रकरणः प्रहरी र आन्दोलनकारीबीच झडप, आँशुको आमाको टाउको फुटयो

न्यून ब्यूरो, जनकपुरधाम । होलीको दिन छुरा प्रहार गरी हत्या गरिएका आँशु यादवको लागि आन्दोलन गर्दा झडप भएको छ ।

जनकपुरधाम उप–महानगरपालिका–२३ विन्धीमा प्रहरी र स्थानीयबीच झडप भएको हो। होलीको दिन छुरा प्रहार गरी हत्या भएका आंशु यादवको हत्यारालाई कारवाही गर्न माग गर्दै विहान देखि सडक जाम गरेर आवत जावत ठप्प बनाएका विन्धीवासी र प्रहरी बीच झडप भएको छ ।

प्रहरीले सडक खोउने क्रममा बल प्रयोग गरेपछि स्थानीयहरु प्रतिरोधमा उत्रेका थिए । सो क्रममा अवस्था गम्भीर बनेपछि प्रहरीले दर्जनौं राउण्ड आश्रु ग्यास प्रहार गरेका छन् ।

स्थानीयले प्रहरीमाथी ढुंगामुढासमेत गरेका छन् । सो क्रममा दर्जनौ स्थानीय र प्रहरी घाइते भएका छन् । जिल्ला प्रहरी कार्यालय धनुषाले कति जना घाईते भएका छन् भन्ने यकिन हुन बाँकी रहेको जनाएको छ ।

गत चैत्र २ गत्ते शनिबार साँझ ५ बजेतिर होली खेल्ने क्रममा विवाद हुँदा स्थानीय लक्षमण महतोका छोरा २१ वर्षीय धर्मेन्द्र महतोले आँशुमाथि छुरा प्रहार गरेका थिए ।

छाती, ढाड र पेटमा छुरा प्रहारबाट गम्भीर घाइते आँशुको उपचारको क्रममा प्रादेशिक अस्पताल जनकपुरमा शनिबार साँझ करिब ६ बजे मृत्यु भएको थियो। प्रहरीले तत्कालै छुरासहित धर्मेन्द्रलाई पक्राउ गरेको थियो । तर आँशुको परिवारजनले अन्य व्यक्तिको संलग्ता रहेको भन्दै उनीहरुलाई पनि हिरासतमा लिन आवाज उठाइरहेका छन् ।

आज विहानदेखि आँशुकी आमा र स्थानीय विन्धीवासीले जनकपुर जलेश्वर सडक खण्ड अवरुद्ध गरेका थिए ।