अध्यक्ष यादवलाई अभद्र गाली, पार्टी कार्यालयमा पेट्रोल छर्किने दलित अगुवा सुनारको धम्की

न्यूज ब्यूरो, जनकपुरधाम । जनता समाजवादी पार्टी (जसपा) नेपालका राष्ट्रिय अध्यक्ष एवम् पूर्व मन्त्री उपेन्द्र यादवलाई दलित अगुवाले अभद्र गाली गर्दै कार्यालयमा पेट्रोल छर्किने धम्की दिएका छन् ।

दलितका लागि दलित अभियान नेपालका अगुवा खगेन्द्र सुनारले आफ्नो अधिकारिक फेसबुक मार्फत जसपा नेपालका अध्यक्ष यादवलाई अभद्र गाली गर्दै जसपा नेपालको कार्यालयमा पेट्रोल छर्केर आगो लगाईदिने धम्की दिएका हुन् ।

उनले आफ्नो फेसबुकमा लेखेका छन्–“जसपा अध्यक्ष उपेन्द्र यादवले सिरहाका गा.पा. अध्यक्ष शिवजी यादवलाई रिहा नगरे दलित बस्तीमा आगो लगाउने धम्की दिएको छ । तेरो पार्टी कार्यालयमा कति लिटर पेट्रोल छर्किन पर्छ मलाई थाहा छ । साला....दम छ भने छोएर हेर – दलितलाई....”

सिरहाको औरही गाउँपालिका वडा नम्बर ५ मा एक डोम समुदायको घर भत्काएको आरोप लागेका औरही गाउँपालिकाका अध्यक्ष शिवजी यादवलाई पक्राउ गरेपछि जसपा नेपालका सिरहा जिल्ला समितिले रिहाईको माग गरेपछि दलित अगुवा सुनारले उपेन्द्र यादवलाई धम्की दिएका छन् । अध्यक्ष यादवले दलित वस्तीमा आगो लगाइदिने धम्की दिएको आरोपसहित उनले स्टेटस लेखेका छन् ।

सिरहाको औरही गाउँपालिकाको सो प्रकरणमा जसपा नेपालका अध्यक्ष उपेन्द्र यादवले यस्तो कुनै प्रतिक्रिया नै नदिएको दाबी गरिएको छ । यद्यपी, दलित अगुवा सुनारले आफूसँग भिडियो क्लीप रहेको र पेश गर्नुपर्ने ठाउँमा पेश गर्ने बताए ।

न्यूज ब्यूरोले दलित अगुवा सुनारसँग सम्पर्क गरी जसपा नेपालका अध्यक्ष उपेन्द्र यादवले दिएको प्रतिक्रियाको प्रमाण उपलब्ध गराईदिन आग्रह गरेपछि उनले दिनुपर्ने ठाउँमा मात्र दिने बताए ।

आईतबार जसपा नेपालका सिरहा जिल्ला अध्यक्ष अशोक कुमार यादवले गाउँपालिका अध्यक्ष शिवजी यादवलाई छुवाछुतको झुठा मुद्दा लगाएको भन्दै रिहाईको माग गरेका थिए । सोही समाचारप्रति टिप्पणी लेख्दै दलित अगुवा सुनारले जसपा नेपालका अध्यक्षलाई लक्षित गरेको देखिएको छ ।

छुवाछुतको मुद्दामा गाउँपालिका अध्यक्ष शिवजी यादवसहित तीन जनालाई पक्राउ गरी कारवाही प्रक्रिया अगाडी बढाइसकेको छ ।

उनको स्टेटसको टिप्पणीमा हजार बढीले प्रतिक्रिया जनाएका छन् । धेरैले सम्प्रादायिक प्रकारको टिपप्णी लेखेका छन् भने धेरैले सुनारसँग सहमति जनाएको देखिएको छ ।

यस सन्दर्भमा जसपा नेपालका अध्यक्ष उपेन्द्र यादवसँग सम्पर्क गर्न खोज्दा सम्पर्क भने हुन सकेनन् । समाजिक सँजालमा समेत उपेन्द्र यादवले दिएको प्रतिक्रिया, धम्की देखिएका छैनन् ।