डोममाथि छुवाछुतको आरोपमा गाँपा अध्यक्ष यादवसहित तीन जना उपर जाहेरी दर्ता

न्यूज ब्यूरो, सिरहा । सिरहामा जातीय छुवाछुतको आरोपमा औरही गाउँपालिकाका अध्यक्ष शिवजी यादवसहित तीनजना उपर जाहेरी दर्ता भएको छ ।

सिरहाको औरही गाउँपालिका वडा नम्बर ५ स्थित आयोजन गरिएको विष्णु महायज्ञको क्रममा एक डोम समुदायमाथि गाउँपालिका अध्यक्ष शिवजी यादव, पूर्व वडाध्यक्ष दिलिप यादव र यज्ञका बाबा बजरँगज् िबाबा उपर जातीय छुवाछुतको जाहेरी दर्ता भएको हो ।

शनिबार जिल्ला प्रहरी कार्यालय सिरहा पुगेका दलित समुदायका अगुवाहरुले तीनै जनामाथि जातीय छुवाछुतको जाहेरी दर्ता गरिएको हो ।

औरही गाउँपालिका वडा नम्बर ५ का अहिले पीडित भनिएका दीपक मल्लिकले दिएको जातीय भेद्भाव तथा छुवाछूतसम्बन्धी कसुरको जाहेरीमा गाउँपालिका अध्यक्ष शिवजी यादव, पूर्ववडाध्यक्ष दिलीप यादव र बजरंगी बाबालाई प्रतिवादी बनाइएको छ ।

औरहीका स्थानीयसमेत रहेका राष्ट्रिय दलित आयोगका पूर्वसदस्य कबुली पासवानका अनुसार, जाहेरीमा प्रतिवादीहरूले पीडित परिवारमाथि जातीय छुवाछूत गरेको, घर तोडफोड गरी विस्थापन गरेको भन्दै कानुनबमोजिम कारबाही हुनुपर्ने र पीडितलाई क्षतिपूर्ति दिइनुपर्ने माग गरिएको छ ।

पीडित परिवारको जाहेरी प्राप्त भएको र यससँगै कानुनी कारबाही प्रक्रिया अघि बढेको सिरहाका प्रहरी प्रमुख प्रहरी उपरीक्षक रमेश पण्डितले जानकारी दिए । जातीय छुवाछूतसम्बन्धी कसुरमा ३ महिनादेखि ३ वर्षसम्म र ५० हजारदेखि २ लाखसम्म जरिवानाको कानुनी व्यवस्था छ ।

चैत १७ देखि आयोजना हुने भनिएको महायज्ञका नाममा फागुन १० मा अछूत भन्दै महायज्ञस्थलमा रहेको मल्लिकको घर गाउँपालिका अध्यक्ष शिवजी यादव, पूर्ववडाध्यक्ष दिलीप यादव र बजरंगी बाबाले डोजर लगाएर भत्काइदिएका थिए ।