वडाध्यक्ष अन्सारीले बनाएका नक्कली बुवा अमानत मियाँ पक्राउ, भारतीयलाई बनाएका थिए नागरिकता

न्यूज ब्यूरो, सिरहा । सिरहामा भारतीय नागरिकलाई नागरिकता दिलाउन नक्कली बुवा बन्ने व्यक्ति पक्राउ परेका छन् । नरहा गाउँपालिका वडा नम्बर ३ खोरियाका अमानत मियाँलाई प्रहरीले पक्राउ गरेको हो ।

मियाँलाई मंगलबार साँझ घरबाटै पक्राउ गरिएको सिरहाका प्रहरी प्रमुख प्रहरी उपरीक्षक रमेश पण्डितले जानकारी दिए । सिरहा जिल्ला अदालतबाट बुधबार म्याद लिएर उनीमाथि विस्तृत अनुसन्धान सुरु हुने उनले बताए ।

‘हामीकहाँ यो विषय आइसकेपछि सुक्ष्म तरिकाले यसको अनुसन्धान अघि बढाएका छौं,’ पण्डितले भने, ‘यसमा संलग्न सबैलाई अनुसन्धान र कारबाहीको दायरामा ल्याउँछौं ।’

नरहा गाउँपालिका वडा नम्बर ३ को वडा कार्यालयको सिफारिसमा जिल्ला प्रशासन कार्यालय, सिरहाले भारतीय नागरिक मोसताक मियाँलाई २०८० असार २६ मा नेपाली नागरिकता दिएको थियो । अमानत मियाँ र उनकी पत्नी रजिना खातुन नक्कली बुबाआमा बनेका थिए ।

नागरिकताका लागि वडाध्यक्ष रुषतम अन्सारी र वडासचिव रामदेव मण्डलले सिफारिस दिएका थिए । वडाध्यक्ष, सचिव र जिल्ला प्रशासनका कर्मचारीले २ लाख भारु घुस लिएर नागरिकता दिलाएको भन्दै जिल्ला प्रशासनदेखि अख्तियार दुरुपयोग अनुसन्धान आयोग र गृह मन्त्रालयसम्म उजुरी परेको छ ।

भारतीयलाई नागरिकता बनाईदिएको समाचार न्यूज ब्यूरोमा प्रकाशित भएको थियो । समाचार प्रकाशित भएपछि वडाध्यक्ष मियाँ आफूलाई बचाउन भूलवंश सिफारिस भएको भन्दै विज्ञप्ति जारी गरेका थिए । तर, प्रशासनमा परेको उजुरीमाथि छानबिन सुरु भईकेपछि वडाध्यक्ष अन्सारी पोलिएका छन् ।