यादवचोक विवादः समाजिक सदभाव नभडकिने गरी चोकको नामाकरण यथाशिघ्र हुन्छः मेयर यादव

न्यूज ब्यूरो, जनकपुरधाम । सबैलाको भठिहनमा यादवचोक लेखिएपछि उत्पन्न भएको विवाद साम्य पार्नको लागि सबैला नगरपालिकाका मेयर कारीराम यादवले यथाशीघ्र चोकको नामाकरण गर्ने प्रतिवद्धता जनाएका छन् ।

सबैला नगरपालिका वडा नम्बर ९ स्थित केही व्यक्तिहरुले जातको नामले यादवचोक लेखेर बोर्ड लगाएपछि दुई समुदायबीच विवाद चुलिएपछि मेयर यादवले यादव चोक नरहने जनाएका छन् ।

वडा नम्बर ९ मा विभिन्न जातजातीको वस्ती रहेको अवस्थामा कोल्हुवामोरका केही व्यक्तिहरुले जातीगत बोर्ड लगाएपछि विवाद उत्पन्न भएको हो । अहिले भठिहनको अवस्था तनावग्रस्त बन्दै गोली चलेपछि मात्र मेयर यादवले अवस्था साम्य पार्न यस्तो निर्णय गरेका हुन् ।

उनले समाजिक सदभाव कायम हुने गरी त्यहाँ सार्वजनिक स्थानमा सबैलाई मान्य हुने गरी चोकको नामाकरण गर्ने प्रतिवद्धता जनाएका हुन् । सोमबार दिउँसो मेयर यादवले एक प्रेस विज्ञप्ति जारी गर्दै जिल्ला प्रशासन कार्यालय धनुषामा आईतबार बसेको सर्वपक्षीय बैठकबाट चोकको नामाकरण सर्वमान्य हुने गरी राख्ने निर्णय भएको जनाएको छ ।