आज कञ्चनवन पुग्दै परिक्रमाको लस्कर, मधेशमा आजदेखि होली सुरु

न्यूज ब्यूरो, जनकपुरधाम । १५ दिने माध्यमिकी परिक्रमाको धार्मिक लस्कर आज महोत्तरीको अन्तिम पडाव स्थल कञ्चनवन पुग्ने भएका छन्।

विधिवत रुपमा प्रारम्भ भएको मधेशको महाकुम्भ मानिने १५ दिने माध्यमिकी परिक्रमाको धार्मिक लस्कर आज महोत्तरीको कञ्चनवन पुगेर होली मनाउने परम्परा रहिआएको छ । परिक्रममा सहभागी साधुसन्त तथा श्रद्धालुहरुले एक आपसमा रँग अबिर दल्दै आज होली मनाउने भएको छ ।

कंचनवनमा साधुसन्तहरु एकआपसमा रंग अबीर दलेर होलीको विधिवत सुरुवात गर्ने छन । कंचनवनमा साधुसन्तले होली मनाएपछि मधेशमा होली पर्वको विधिवत सुरुवात भएको मानिन्छ । कञ्चनवको होली र धार्मिक लस्करलाई मध्यनजर गर्दै भव्य मेलाको आयोजना समेत हुँदै आएको छ ।

आज राती कञ्चनवनमै विश्राम गर्ने परिक्रमाका धार्मिक लस्करले भोली विहानै धनुषाको पर्वताको लागि प्रस्थान गर्नेछन् । बाजागाजाका साथ हजारौका सँख्यामा रहेका साधुसन्तहरु तथा श्रद्धालुहरुको धार्मिक लस्कर १ सय ५ किलोमिटरको यात्रा पैदल तय गर्नेछन् । परापूर्वकालदेखि चलिआएको यो धार्मिक लस्करको लागि सुरक्षा व्यवस्था समेत कडा मिलाइएको हुन्छ ।

परिक्रमा नेपाल र भारतको १५ स्थानको बसाई पछि इतिश्री गर्ने गरिन्छ । जसमध्ये धनुषाको जनकपुर, धनुषाधाम, हनुमानगढी, औरही, सतोषर र पर्वता, महोत्तरीको मटिहानी, जलेश्वर, मडै, धुव्रकुण्ड र कञ्चनवन, भारतको गिरिजास्थान फुलहर, कल्याणेश्वर, विशौल र करुणा लगायतका ठाउँहरुमा परिक्रमाबासीहरु बसोबास गर्छन । परिक्रमाबासीहरु करिब १२८ किलोमिटरको यात्रा गर्ने गर्छन

धार्मिक मान्यता अनुसार त्रेतायुगमा राम र जानकी विवाहपश्चात् विहार गर्दै मिथिलाका विभिन्न क्षेत्र पुगेका थिए। त्यही क्रममा फागुन शुक्ल सप्तमीका दिन कञ्चनवन पुगेर रङ खेलेका थिए। त्यही दिनको सम्झनामा कञ्चनवनमा ‘होरी उत्सव’ मनाउने चलन छ।