मलाई फँसाउन विपक्षी दलका नेता पत्रकार सबै लागिसकेः डा. सिके राउत

न्यूज ब्यूरो, जनकपुरधाम । जनमत पार्टीका राष्ट्रिय अध्यक्ष डा. सिके राउतले आफूलाई फँसाउनको लागि प्रतिपक्ष दलका नेता र केही पत्रकारहरु लागिपरहेको आरोप लगाएका छन् ।

उनले आफ्नै श्रीमतिलाई षडयन्त्रमा पारी मलाई फँसाउनको लागि विपक्ष राजनीतिक पार्टीका केही नेता र सो पार्टीसँग तालुकात राख्ने केही पत्रकारहरु समेत चरित्र हत्या गर्न कुनै कसर बाँकी नराखेको बताएका छन् ।

उनले आफ्नै श्रीमति र माईती पक्षले ब्लैकमेलिँग गरी करोडौँ रुपैयाँ असुल गर्ने दाउमा रहेको आरोप लगाउँदै यसको फाईदा विपक्षी दलका नेता केही पत्रकारहरुले उठाउन खोजेको बताएका छन् । उनीहरुले आफ्नो राजनीतिक करियर बर्बाद पार्नको लागि चौतर्फी घेराबन्दी गरेको प्रतिक्रिया दिएका छन् ।

यसका साथै उनले आफ्नो अधिकारीक फेसबुक पेजमा एक लामो स्टेटस लेख्दै आफ्नो श्रीमतिले विपक्षी दलका केही नेताहरुसँग मिलेर ब्लैकमेलिँगमा लागेको आरोप लगाएका छन् ।

उनले आफ्नो फेसबुकमा यसरी लेखेका छन्ः

ब्लैकमेलिङ्गको कुनै अन्त हुँदैन #LetsFaceIt

दिनहुँ नयाँ नयाँ डिमान्ड गर्ने, यति पैसा देऊ यो गर यहाँ जान देऊ नभए म मिडियामा जान्छु, पत्रकार सम्मेलन गर्छु, मानवअधिकार/महिला आयोग/प्रहरीमा जान्छु , सामाजिक संजालमा भिडियो हालेर बदनाम गर्छु, नयाँ नयाँ झूठा आरोप लगाउँछु, टोल छरछिमेकमा हल्ला गरेर बदनाम गर्छु भनेर विगत दशकमा श्रीमती र माइत पक्षबाट हुँदै आएको ब्लैकमेलिङ्गबाट आजित भइसकेर नै यसपालि मैले हिम्मत गरेको हो। ल, जति झूठा आरोप लगाउनु छ लगाऊ, तर ब्लैकमेलिङ्ग अब सहन सकिन्न।

किनकि ब्लैकमेलिङ्गको अन्त हुँदैन, हेरिसकें। आज श्रीमतीले डिमान्ड गरेको गाडी, घर, २ वटा नोकर, २ वटा ड्राइभर, बडी गार्ड वा ५-१० करोड रूपैयाँ दिए पनि भोलि देखि नै फेरि अर्को डिमान्ड आउँछ, फेरि अर्को नयाँ झुठा आरोप, फेरि बदनाम गर्ने धम्की र त्यही ब्लैकमेलिङ्ग। यो सबै हामीले भोगिसक्यौं।

श्रीमतीले नै डिभोर्स लगातार शुरूदेखि माग्दैआएको हो, तर विरामी छिन् भनेर अहिलेसम्म सेवा गर्दै थिएँ। यसपालि पनि डिभोर्स उनैले मागेकी हुन्, दिन पनि उनी नै तैयार थिईन् तर जब मैले हिम्मत गरेर पहिलो पटक 'फुल एण्ड फाइनल' गर्न तैयार भएँ, अनि उनको मानसिक अवस्थाको फायदा उठाउँदै माइत पक्ष र केही दुश्मनहरूले 'नेगोशिएट' गर्नका लागि यो सारा लफडा लगाएको हो।

माइत पक्षलाई छ कि पहिला २५-५० करोड रुपैयाँ, घर, गाडी, नोकर सबै देओस् नभए सम्बन्ध यसरी नै कानूनी रूपमा राखिराख्ने, टोर्चर दिइराख्ने, अनि निरन्तर डिमान्ड गर्दै ब्लैकमेलिङ्ग गरिराख्ने। त्यो पैसाले पूरै माइत मोजमस्ती गर्ने, जसरी भारतमा पुरुषहरूमाथि झूठा मुद्दा लगाएर पैसा वसूल गरिन्छ, त्यसरी।

त्यसमा राजनैतिक फायदा लिन अहिले साथ दिएका छन् मेरा दुश्मन र विरोधी पार्टीका नेताहरू, आफ्नै पार्टीका केही नेताहरू र राज्य। सबैलाई सी.के. राउतको राजनीति सिध्याउनु जो छ। श्रीमतीलाई आफ्ना कसैमाथि कुनै नातेदारमाथि कुनै भरोसा छैन तर ती नेताहरू जसको नाम पनि उनलाई थाहा छैन, VIP ३-३ वटा गाडीमा आएर दिनभरि सीके राउतलाई कसरी फँसाउने, कसरी जेल पठाउने छलफल गर्छन्। बालबच्चालाई घरमा भोक-भोकै एक्लै छोडेर, बच्चाहरू विरामीहुँदा पनि केही मतलब नगरेर श्रीमती त्यही नेता र दुश्मनहरूसँग मलाई फसाँउन, झुठा मुद्दा लगाउन, दिनभरि छलफल गर्दै हिँड्ने।

तर सत्य कहिले लुक्दैन। ब्रम्हाण्डको एक कुनामा एउटा फोटोन हल्लिँदा त ब्रम्हाण्डको अर्को कुनाले थाहा पाउँछ (Quantum Entanglement) , भने यी सबैको चलखेलको पर्दाफाश प्रमाणसहित हुने नै छ।