तस्करले हत्या गरेका सशस्त्र प्रहरीका सई यादवको अन्तिम विदाई, पूर्व वडाध्यक्षसहित दुई जना पक्राउ

न्यूज ब्यूरो, सिरहा । सिरहामा तस्करले हत्या गरेका सशस्त्र प्रहरीका सई लक्ष्मण यादवको आज अन्तिम विदाई गरिएको छ ।

सिरहाको बरियारपट्टि गाउँपालिका वडा नम्बर १ कचनारी बोर्डरस्थित चेकजाँचको क्रममा रहेका सशस्त्र प्रहरीका सई लक्ष्मण यादवलाई दारु बोकेको गाडी तस्करको गाडीले ठक्कर दिएर मारेको थियो ।

सिरहाको बिओपी बडहरीबाट खटेका यादवलाई ठक्कर दिएपछि गम्भिर घाईते बनेका थिए । गम्भीर घाईते भएका सई यादवलाई उपचारका लागि एम्बुलेन्समा राखी प्रादेशिक अस्पताल लहानमा लगिएको थियो । विहान ४ बजे चिकित्सकद्वारा मृत घोषणा गरियो ।

नेपाल–भारत सीमादेखि करिब डेढ किलोमिटरको दुरीमा भएको सो घटनामा विभिन्न क्लु, प्रमाणहरु अध्ययनपछि तस्करी गर्ने गाडी भारतीय नम्बर प्लेटको रहेको भेटिएको हो । सो गाडी सिरहाका नामुद तस्करको मदिरा ढुवानीमा प्रयोग भएको बताइएको छ ।

सो घटनामा संलग्न रहेको ब्यक्तिहरु र सई यादवलाई ठक्कर दिने गाडीको नम्बरसहित गाडी समेत पत्ता लागिसकेको प्रहरी स्रोतले बताएको छ। यस घटनामा सिरहाका नामुद तस्कर मानिएका सन्तोष यादव र मनोज यादवलाई सिरहा प्रहरीले नियन्त्रणमा लिएर अनुसन्धान गरिरहेको छ ।

सँतोष यादव सिरहा गोलबजारका दारु व्यापारी हुन । उनी कैयौँ बर्षदेखि बोर्डर छेउको झाँझपट्टिस्थित बेनामी गोदामबाट करोडौँको मदिरा तस्करी गर्दै आएको खुलेको छ । सोहीसँगै पक्राउ परेका मनोज कुमार यादव पूर्व वडाध्यक्ष हुन् । सिरहा नवराजपुर गाउँपालिका वडा नम्बर ५ बाट २०७९ सालको स्थानीय तहको चुनावमा प्रत्यासी बनेपछि उनी खर्च धान्न तस्कर बनेको बताईन्छ ।

जानकारी अनुसार, मनोज कुमार यादव पूर्व प्रहरी पनि हुन् । नेपाल प्रहरीमा काम गरिसकेका मनोज यादवले चुनाव लडेपछि राजनीतिमा आएका थिए । २०७४ सालको चुनाव जितेका मनोज यादव दोस्रो स्थानीय तहको चुनावमा हारेपछि उनी मदिरा तस्करीमा संलग्न भएका थिए । उनलाई समेत पक्राउ गरिएको छ । अझै दुई जना भने फरार रहेका छन् ।

जिल्ला प्रहरी कार्यालय सिरहा एसपी रमेश पण्डितले सो घटनामा आफ्नो मातहत प्रहरी खटाएर अपराधी पत्ता लगाउन सफल भएका हुन् । सिरहा प्रहरीले घटनाको २४ घण्टा नबित्दै घटनामा संलग्न दुई जना शंसकित व्यक्तिलाई पक्राउ गर्न सफल भएको हो ।

यस घटनामा जिल्ला प्रहरी कार्यालय सिरहाका प्रहरी प्रवक्ता एवम् डिएसपी बिरेन्द्र पासवानले आफ्नो कमाण्डमा खटाइएको प्रहरीहरुको सहयोगमा सो उनीहरुलाई पक्राउ गरेको हो । ठक्कर दिने भारतीय नम्बर प्लेटको गाडी समेत नेपाल ल्याउने तयारी गरिएको हो ।