जनकपुरको राजदेवीमा खोईच भराई सुरु, भोली साँझदेखि बोकाबली प्रदान हुने

न्यूज ब्यूरो, जनकपुरधाम । जनकपुरको प्रसिद्ध शक्तिपीठ राजदे्वी मन्दिरमा खोईच भराई कार्यक्रम सुरु भएको छ ।

आयोजक महावीर युवा कमिटिले दिएको जानकारी अनुसार, आज बुधबार साँझदेखि खोईच भराई कार्यक्रम सुरु भएको हो । खोईच भराई कार्यक्रम भोली विहिबार विहान ९ बजेसम्म चल्ने छ ।

महिलाहरुले भाकल पूरा भएपछि देवीको खोईच भर्ने गरिन्छ । खोईच भराईको लागि महिलाहरुले विधिवत रुपमा मन्दिरको पश्चिमी गेटमा खोईच भर्ने गरिन्छ ।

आम श्रद्धालुमा राजदेवीमा खोईच भराई कहिले हुने भनेर अलमलता रहेकोमा समितिले खोईच भराई बुधबारदेखि नै सुरु भएको बताएको छ ।

यस्तै, भोली बिहान ४ बजेदेखि नै प्रसाद चढाउने कार्यक्रम हुनेछ । यसअघि राती १२ बजेदेखि सुरु हुँदै आएकोमा यसपाली बिहान ४ बजेदेखि व्यवस्थापन गरिएको हो ।

बोकाबली भने भोली साँझ ७ बजेदेखि नै सुरु भईसक्ने आयोजकले जनाएको छ ।