धनुषा प्रहरीको ९ फरार थुनुवामध्ये ४ जना पक्राउ, ५ अझै फरार

न्यूज ब्यूरो, जनकपुरधाम । जिल्ला प्रहरी कार्यालय धनुषाबाट बिहानै ९ जना थुनुवा फरार रहेकोमा ४ जनालाई पक्राउ गरिएको छ ।

भेन्टिलेशन फोडेर फरार भएका ९ जना थुनुवामध्ये एक जना बिहानै जनकपुरमै पक्राउ परेका छन् भने अन्य तीन जना धनुषाको लखौरीमा पक्राउ परेका छन् ।

जिल्ला प्रहरी कार्यालय धनुषाका प्रहरी प्रवक्ता डिएसपी रञ्जन अवाका अनुसार थप तीनजना दिउँसो पक्राउ परेका हुन् । पक्राउ पर्नेहरुमा अभद्र व्यवहार मुद्दाका विक्की कार्की, लागुऔषध मुद्दाका अभास्कर यादव रोशन कुमार मण्डल रहेका छन् । उनीहरुलाई धनौजी गाउँपालिका वडा नं. १ लखौरीबाट पक्राउ गरिएको प्रवक्ता अवाले जनाए ।

जिल्ला प्रहरी कार्यालय धनुषाको भेन्टिलेशन फोडेर अति संवेदनशिल सुरक्षाकाबीच उनीहरु फरार भएपछि धनुषा प्रहरी नेतृत्वमाथि प्रश्न उठेको छ । उनीहरुलाई प्रहरीकै मिलोमत्तोमा भगाउन सम्भव हुने प्रतिक्रिया समाजिक सँजालहरुमा देखिएको छ । यद्यपी, धनुषा प्रहरीले यस्ता भ्रामक तथ्यप्रति ध्यान नदिन आग्रह गरेको छ ।

प्राप्त जानकारी अनुसार, केही प्रहरी अधिकारी समेत कारवाहीमा परेका छन् ।