मूर्ति विसर्जनको विषयमा मुखियापट्टि मुसरनियाँमा दुई समुदायबीच तनाव, कसले उक्सायो ?

न्यूज ब्यूरो, जनकपुरधाम । हिन्दु धर्मावलम्बीहरुको देवता विश्वकर्मा पूजापछि मूर्ति विसर्जनको विषयलाई लिएर दुई समुदायबीच तनाव उत्पन्न भएको छ ।

धनुषाको मुखियापटिट् मुसरनीयाँ वडा नं. ३ तुल्सीयाही जब्दीस्थित बुधबार विश्वकर्माको मूर्ति विसर्जनको बेला हिन्दु समुदाय र मुस्लिम समुदायबीच तनाव उत्पन्न भएको हो ।

बुधबार साँझ मूर्ति विसर्जन गर्न गईरहेको बेला हिन्दु समुदायका युवकहरुले मुस्लिम समुदायको मस्जिद अगाडी बाट मूर्ति लिएर जान खोजेपछि र नाचगान गरेपछि विवाद सुरु भएको जनाइएको छ । सदैव झै सोही रुटबाट जाने गरेकोमा बुधबार समेत मूर्ति विसर्जनकर्ताहरुले मूर्ति लिएर गईरहेको अवस्थामा मुस्लिम समुदायका व्यक्तिहरुले पत्थरबाजी गरेको आरोप छ ।

मूर्ति विसर्जनको बेला एउटै रुट रहँदै आएकोमा बीचमा मस्जिद पर्ने गरेको छ । सोही बाटो भएर मूर्ति बिसर्जनको लागि जाँदै गर्दा मुस्लिम समुदायका व्यक्तिहरुले पत्थरवाजी गरेको प्रत्यक्षदर्शीहरुले जनाएको छ ।

सो सन्दर्भमा गाउँपालिका अध्यक्ष जयकुमार यादवले सरस्वति पूजामा समेत यस्ता प्रकारको घटना भएको बताए । उनले यस घटनामा दोषी पत्ता लगाएर कारवाहीको माग गरे । गाउँपालिका अध्यक्ष यादवले बुधबारको घटनामा दुवै पक्षमध्ये दोषी जो पक्षबाट भएपनि कारवाही हुने जनाए ।

हिन्दु समुदायका व्यक्तिहरुले मूर्ति बिसर्जनको लागि प्रत्येक बर्ष सोही बाटो भएर जाने गरेका छन् । विगत केही बर्षदेखि त्यहाँका मुस्लिम समुदायले हिन्दु समुदायको चाडपर्वमा उच्छृँगल गतिविधि गर्दै आएको आरोप छ । मुस्लिम समुदायले चलाएको पत्थर लागेर हिन्दु सम्राट सेनाका केही कार्यकर्ता घाईते समेत भएका छन् ।

अहिले त्यहाँको अवस्था तनाव रहेको छ । दुई समुदायबीच सहमतिको प्रयास स्वरुप विहिबार राती बैठक बस्ने सहमित भएको थियो । शुक्रबार बस्ने गरी भएको सहमतिले तनाव समाप्त गर्ने जिल्ला प्रहरी कार्यालय धनुषाले जनाएको छ ।

जिल्ला प्रहरी कार्यालय धनुषाका एसपी भुवनेश्वर तिवारीले सो ठाउँमा शान्ती कायम गर्नको लागि आफैँ अग्रसरता देखाएका छन् । उनी आफैँ पुगेर त्यहाँको वस्तुस्थितिको जानकारी लिँदै सहमति गराउने प्रयासरत रहेका छन् ।