सीमाबाट हुने तस्करीमा प्रहरीको प्रमाण भेटिए तुरुन्त कारवाही हुन्छः डिआईजी आचार्य

न्यूज ब्यूरो, जनकपुरधाम । मधेश प्रदेशको नयाँ डिआईजी लालमणि आचार्यले कार्यभार सम्हाले लगत्तै मातहतका प्रहरी निकायलाई सीमाबाट हुने तस्करी रोक्न निर्देशन दिएका छन् ।

कार्यभार सम्हालेपछि डिआईजी आचार्यले मधेश प्रदेशको ८ वटै जिल्लाका जिल्ला प्रहरी, ईलाका प्रहरी, प्रहरीचौकीहरुलाई सीमाबाट हुने तस्करीलाई रोक्नको लागि निर्देशन दिँदै कनेक्सन भएको पाईएमा तुरुन्त कारवाही गर्ने जनाएका छन् ।

बुधबार बिहान न्यूजब्यूरोसँग कुराकानी गर्दै डिआईजी आचार्यले नेपाल–भारतको सीमाबाट हुने् तस्करीमा कुनै प्रहरीको संलग्नताको प्रमाण भेटिए तुरुन्त कारवाही गर्ने जनाएका छन् । धनुषासहित अन्य जिल्लाहरुमा पर्ने सीमानाकाबाट नेपाल प्रहरीकै मिलोमत्तोमा तस्करी भईरहेको जनगुनासो बढीरहँदा एक जिज्ञासामा डिआईजी आचार्यले एउटा मात्र प्रमाण भेटिए तुरुन्त कारवाही गर्ने बताएका छन् ।

उनले सीमाबाट हुने तस्करीको समानको प्रमाण जसको ईलाका, कार्यक्षेत्रबाट फेला पर्छ त्यहाँको ईन्चार्जलाई त्यतिबेला कारवाहीको लागि बोलाइने बताए । उनले कनिष्ठ कर्मचारीभन्दा पनि ईन्चार्जलाई कारवाही गर्ने बताएका छन् ।

उनले भने–“खुल्ला सीमाको कारण तस्करी भईरहन्छन् । यसको लागि मैले आफ्नो मातहतका प्रहरी निकाय र अधिकारीलाई रोक्नको लागि निर्देशन दिसकेको छु । तस्करी भईरहेको भिडियो, तस्विर वा अन्य केही प्रमाण प्राप्त भए त्यहाँको ईन्चार्जलाई कारवाही हुन्छ । छानबिन सुरु हुन्छ, छानबिनमा जो जो प्रहरी अधिकारीको कनेक्सन हुन्छ त्यो सबै जान्छ, यसमा ढुक्क हुनुस् ।”

वि.सं. २०७४ सालमा जिल्ला प्रहरी कार्यालय धनुषामा एसपी (प्रहरी उपरीक्षक) भएर बसेका डिआईजी आचार्यले यहाँको सीमा तस्करी र प्रहरीको कनेक्सनबारे जानकार छन् । प्रहरी प्रमुखको भूमिकामा हुँदा जिल्ला प्रहरीबाट हुने कार्य सम्पादनमा उत्तम भूमिका निभाएका एसपीको रुपमा परिचित थिए । डिआईजीमा बढुवा भएपछि आचार्य मधेश प्रदेशको प्रहरी प्रमुखको जिम्मेवारी सम्हालेका हुन् ।