प्रादेशिक अस्पताल गौरमा डाक्टरहरु व्यस्त भएपछि पियनले अप्रेशन गर्दैै गरेको तस्विर भाईरल

न्यूज ब्यूरो, रौतहट । मधेश प्रदेशको रौतहट जिल्लाको सदरमुकाम गौरस्थित रहेको प्रादेशिक अस्पतलमा कार्यालय सहयोगी (पियन) ले अप्रेशन गर्दैै गरेको तस्विर भाईरल बनेको छ ।

न्यूज ब्यूरोका रौतहट संवाददाता सँजय सहनीले सो तस्विर फेला पार्न सफल भएका छन् । तस्विरमा देखिएका केही चिकित्सकको टीममा अस्पतालका पियनले समेत मेडिकल औजार लिएर अप्रेशन गरिरहेको देखिएको हो ।

तस्विरमा घेरा गरिएका व्यक्ति अस्पतालका पियन जमारुल शेख हुन् । उनी अस्पतालको पियनको रुपमा कार्यरत छन् । गौर अस्पतालमा कार्यरत सर्जन, चिकित्सकहरु आफ्नो नीजि क्लीनिकमा व्यस्त भएपछि पियनले समेत अप्रेशन गर्दै गरेको तस्विर बाहिरिएको हो ।

यस सन्दर्भमा गौर अस्पतालका मेडिकल सुपरिटेन्डेन्ट (मेसु) मुरारी ठाकुरलाई सम्पर्क गर्दा उनले फोन उठाएनन् ।

भाईरल बनेको तस्विरको सन्दर्भमा आरोपित कार्यालय सहयोगी शेखले भने सो तथ्यलाई खण्डन गरे । उनले अप्रेशन चलिरहेको बेला डाक्टरहरुको आदेशमा लाईट (प्रकाश) देखाउन मात्र गएको दाबी गरेका छन् ।

उनले अप्रेशनको टीमले आफूलाई लाईट देखाउन सहयोग गर्न भनेपछि मात्र अप्रेशन थिएटरमा गएर लाईट देखाएको तस्विर भाईरल गरिदिएको आरोप लगाए । अप्रेशन थिएटरमा हाई क्वालिटीको लाईट जडान भएको सन्दर्भमा उनले बोल्न चाहेनन् ।

यद्यपी, उनको हातमा लाईट नभएर मेडिकल औजार जस्तो देखिएको हो । समाजिक सँजालमा भाईरल बनेको तस्विरप्रति उनले आपत्ति जनाए ।