जनकपुरधामका मेयर साहको निर्देशनमा नगर प्रहरीले मारे साँढे, कैयौँलाई अपाँग बनाएर फाले

न्यूज ब्यूरो, जनकपुरधाम । जनकपुरधाम उपमहानगरपालिकाका मेयर मनोज साहको निर्देशनमा नगर प्रहरीले साँढेलाई मारेर फालेको घटना बाहिरिएको छ ।

जनकपुरधाम उपमहानगरपालिकाभित्र रहेको बुढो साँढेहरुलाई निर्घात कुटपिट गरी मारेर फालेको हो । धनुषाको नक्टाझिझस्थित खोला किनारमा साँढेलाई निर्घात कुटपिट गर्दै बेहोस बनाएर फालेर भागेको दृश्य सिसिटिभी फुटेजमा कैद भएको हो ।

जनकपुरधाम उपमहानगरपालिकाका मेयर साहको प्रत्यक्ष निर्देशनमा नगर प्रहरीले साँढेलाई ईन्जेक्सन लगाउनुको साथै मर्ने गरी कुटेर फाल्दा एक साँढेको मृत्यू भएको हो । कैयौँ साँढे जीवन र मृत्यूसँग जुधिरहेको अवस्था छ ।

रातीको समयमा साँढेलाई कुटपिट गरी बेहोस बनाएर महेन्द्रनगर, सखुवा, नक्टाझिझको विभिन्न खोला किनारमा अपाँग बनाएर फाल्ने गरेको घटना बाहिरिएको हो । जनकपुरधाम उपमहानगरपालिकाले नामको लागि गौशाला बनाएपनि साँढेको हालातप्रति सरोकारबालाहरुको ध्यानाकर्षण भएको छ ।

केही साँढेहरुलाई बर्दिवासको जँगल छेउमा समेत फालेको भेटिएको हो । गौशाला–सम्सी सडक खण्डमा साँढेहरु घाईते अवस्थामा भेटिएको हो । सबै साँढे जनकपुर शहरबाट लगेर नगर प्रहरीले फालिदिएको बताईएको छ ।

यस सन्दर्भमा जनकपुरधामका मेयर मनोज साहसँग सम्पर्क गर्न खोज्दा सम्पर्क भने हुन सकेनन् ।