धनुषाको शहिदनगरमा रोग निको पारिदिने भन्दै लालच दिएर धर्म परिवर्तन, जनप्रतिनीधि मौन

न्यूज ब्यूरो, जनकपुरधाम । धनुषाको शहिदनगर नगरपालिकाको विभिन्न वडामा क्रिश्चन धर्मावलम्बीहरुले अन्य धर्मावलम्बीहरुलाई लोभ लालच दिएर धर्म परिवर्तन गराईरहेको पाईएको छ ।

सेवा भावको नाममा शहिदनगरको विभिन्न स्थानमा चर्चको घर बनाएर अन्य धर्मका महिलाहरुलाई झुक्याएर धर्म परिवर्तन गराउन थालेको हो । धर्म परिवर्तनको लागि महिलाहरुलाई विभिन्न प्रलोभन दिँदै आएको बुझिएको छ ।

सोही क्रममा शहिदनगर नगरपालिका वडा नं. ३ यदुकूहाको झण्डाचोकस्थित चर्च बनाएर क्रिश्चन धर्म मान्ने एजेन्टहरुले हिन्दु धर्मावलम्बीहरुलाई प्रलोभन दिएर धर्म परिवर्तन गराउन थालेको हो ।

रोग नलाग्ने, लागेको रोग निको हुने, डाक्टर कहाँ जानु नपर्ने, मोटो रकम दिने, खान लाउन पैसा दिने, बालबच्चा निःशुल्क पढाईदिने जस्ता प्रलोभन दिएर सोझासाझा महिलाहरुलाई धर्म परिवर्तनको लागि चर्च लग्न थालेको हो । त्यसमा बालबालिकाहरुलाई समेत लगिएको देखिएको छ ।

क्रिश्चनहरुको मिशन अनुसार शहिदनगरको विभिन्न स्थानमा चर्च निर्माण गरेको हो । कमला नगरपालिका वडा नं. २ सराबे पुलस्थित समेत चर्च निर्माण गर्न थालेपछि स्थानीयहरुले रोक्का गरिदिएको हो । गाउँमा धर्म परिवर्तन गराए वापत एजेन्टहरुले मोटो रकम पाउँदै आएका छन् ।

विभिन्न गाउँमा क्रिश्चन धर्मका एजेन्टहरुले मोटो रकमको लोभमा सोझासाझालाई प्रलोभनमा पारी धर्म परिवर्तनको लागि उक्साउने गरेका छन् ।

यता, धर्म परिवर्तन गैर कानुनी रहेको भएपनि स्थानीय प्रशासन र स्थानीय जनप्रतिनीधि भने मौन देखिएका छन् । शहिदनगरका वडाध्यक्ष, मेयर, उपमेयर वा सरोकारबालाले समेत यसमा कुनै चासो नलिएको देखिएको छ ।