मधेशका स्वास्थ्यमन्त्री सिँह एक्सनमा, जनस्वास्थ्य प्रयोगशालामा धक्कामुक्की

न्यूज ब्यूरो, जनकपुरधाम । मधेश प्रदेशका स्वास्थ्य तथा जनसँख्यामन्त्री सत्रुधन प्रसाद सिँहले मधेशका स्वास्थ्य सँस्थाहरुमा छडके सुरु गरेका छन् ।

मधेशको अस्पताल, प्रयोगशालाहरुमा सुशासन कायम गर्नको लागि मन्त्री सिँहले अचानक छडके कार्य सुरु गरेका छन् । छडकेको क्रममा गैर व्यवहारिक गतिविधि गर्ने कर्मचारीलाई सो सँस्थाबाट हटाउन सुरु गरेका छन् ।

सोही क्रममा आईतबार जनकपुरको प्रादेशिक जनस्वास्थ्य प्रयोगशालका विवाद मिलाउन मन्त्री सिँह सचिवसहितको टोलीसहित प्रदेश जनस्वास्थ्य प्रयोगशाला पुगे ।

निमित्त निर्देशकको हाजिरी र निवर्तमान निर्देशकको रमानाको विषयमा मधेश प्रदेश जनस्वास्थ्य प्रयोगशालामा आइतबार धक्कामुक्की भएपछि मन्त्री सिँह र मन्त्रालयका सचिव डा. प्रमोद कुमार यादवको टोली प्रयोगशाला पुगे ।

संघका एघारौं तहका कर्मचारी डा. श्रवण मिश्र १८ साउन २०७७ मा प्रयोगशालामा निर्देशक थिए । केन्द्रको स्वास्थ्य तथा जनसंख्या मन्त्रालयले २० असारमै उनलाई दरबन्दी रहेको कोशी अस्पताल, बिराटनगरमा काज फिर्ता जान भनेको थियो । तर दुईपटक सरुवाको प्रयास टार्दै उनले जनकपुर छाडेनन् ।

पछिल्लो पटक मधेश प्रदेशको मुख्यमन्त्री कार्यालयले २० साउनमा निर्देशक मिश्रलाई २४ घण्टाभित्र बरबुझारथ गरेर सरुवा भएको ठाउँमा जान निर्देशन दियो । अनि, नवौं तहका मृत्युञ्जयप्रसाद साहलाई निमित निर्देशकको जिम्मेवारी तोक्यो । उनी ११ फागुन २०८० मा यहाँ कार्यरत थिए ।

मिश्रले प्रयोगशाला छाडेनन् । ‘२४ घण्टाभित्रै बरबुझारथ गरी जानुपर्ने कानुनमा कतै उल्लेख छैन । त्यसको २० दिन भित्र जान सकिन्छ’ उनले तर्क गरे ।

शुक्रबार उनी कार्यालयमा थिएनन्, निमित निर्देशकको जिम्मेवारी पाएका मृत्युञ्जयप्रसाद साह उपस्थित भएर हाजिर गरे । तर आइतबार मिश्रले विवाद निकाले ।

निमित्त निर्देशक साह आइतबार कार्यालयमा पुग्नु अगावै डा. मिश्र पुगिसकेका थिए । मूलगेटमा ताल्चा लगाउन लगाए, उनी पक्षका कर्मचारीले यादवलाई निर्देशकको कार्यकक्षमा प्रवेश गर्न दिएनन् । त्यसक्रममा धकेलाधकेल भयो । मिश्र पक्षका कर्मचारीहरुले धक्काधक्कीसँगै आफूलाई दुर्व्यवहार गरेको साहको आरोप छ ।

विवादले उग्ररुप लिएपछि मुख्यमन्त्री शतिकुमार सिंहले स्वास्थ्यमन्त्री र सचिवलाई जान निर्देशन दिए । किनकी मिश्र तत्कालीन सरकारको नेतृत्व गरेको जनता समाजवादी पार्टी (जसपा) नेपालका नेताहरुको जोडबलमा आएका थिए ।

झन्डै तीन घण्टा बसेर निमित्त निर्देशक साहलाई प्रयोगशालाको नेतृत्व बुझाए । ‘मुख्यमन्त्रीजीले निमित्त निर्देशक हाजिर हुन आउँदा अवरोध भयो । तपाईंहरु पुगे विधिसम्मत गर्न निर्देशन भएपछि मन्त्रीजिसँगै म पनि आएको हुँ’, सचिव यादवले भने ।

मिश्रले भने दिनरात काम गरेर उदाहरणीय प्रयोगशाला बनाएको पुरस्कार पाएको प्रतिक्रिया दिएका छन् । प्रयोगशालामा दिनहुँ ३ ०० देखि ४०० बिरामीको स्वास्थ्य परीक्षण हुन्छ ।

यता, स्वास्थ्यमन्त्री सिँहले प्रदेशको विभिन्न प्रादेशिक अस्पतालहरुमा छडके तयारी गरेका छन् । अस्पतालहरुमा विरामीसँग गैर समाजिक व्यवहार गरिने, विरामीलाई नीजि क्लीनिकमा पठाउन बाध्य बनाउने, विरामीको कुरुवासँग असभ्य व्यहार गर्ने, अस्पतालमा समेत राजनीति गर्ने कर्मचारीलाई फटाफट हटाउने तयारी गरिएको बताईएको छ ।