पत्रकार विनय प्रकरणमा प्रहरीले बुझायो मुद्दा, अझै पक्राउ गर्न सकेनन फरार अभियुक्तहरु

न्यूज ब्यूरो, जनकपुरधाम । पत्रकार विनय कुमार यादवको शंकास्पद मृत्यू प्रकरणमा फरार अभियुक्तको सूचिमा रहेका व्यक्तिहरुलाई धनुषा प्रहरीले अझै पक्राउ गर्न सकेका छैनन् ।

घटना भएको दुई महिना बढी भईसक्दा समेत अभियुक्तहरुलाई पक्राउ गर्न सकेको छैनन् । धनुषा प्रहरीले धनुषाधाम नगरपालिका वडा नम्बर ५ नौयसविघा बस्ने स्थानीय सुशिल यादव, उनका छोरा धीरेन्द्र यादव र वीरेन्द्र यादव अझै फरार रहेकोमा धनुषा प्रहरीले चासो लिन छाडेको हो । प्रहरीले अदालतमा मुद्दा बुझाईसकेपछि जिम्मेवारीबाट पन्छिन खोजेको आरोप परिवारजनको छ ।

पत्रकार यादवका भाई शंकर यादवले धनुषा प्रहरीले विनय यादवको शंकास्पद मृत्यू प्रकरणमा धनुषा प्रहरीको सुरवाती कारवाही सक्रिय रहेपनि अहिले मुद्दालाई सेलाउन खोजेको आरोप लगाएका छन् । गत बैशाख ११ गते विहान करिब ४ बजेको समयमा पत्रकार यादवको ढल्केवर–जनकपुरधाम सडकखण्डमा शंकास्पद मृत्यू भएको थियो । यद्यपी, परिवारजनले घेरा हालेर योजना तहत हत्या गरेको दाबी गर्दै आएको छ ।

न्यूज ब्यूरोका कार्यकारी सम्पादकको रुपमा समेत कार्य गरेका स्वर्गीय पत्रकार यादवको मुद्दामा सरकारी वकिलले धनुषा प्रहरीले अधुरो मिसिल बुझाएको भन्दै मिसिल पूरा गरी ल्याउन आदेश गरेको थियो । सोही प्रकरणमा पक्राउ परेका मोटरसाईकल चालक लक्ष्मीनारायण भन्ने ललन यादवलाई समेत हाजिरी जमानीमा छाडेपछि परिवारजन असन्तुष्टि प्रकट गरेका छन् ।

पक्राउ पूर्जी जारी भएका धीरेन्द्र र वीरेन्द्र सिरहाको नरहामा आफन्त कहाँ बस्दै आएका छन् भने उनका बुवा सुशिल यादव शहिदनगर नगरपालिका वडा नं. १ बालाबाखरस्थित बस्दै आएको बताईएको छ । धनुषा प्रहरीलाई उनीहरुको लोकेशन थाहा हुँदाहुँदै पक्राउ नगरेको भन्दै प्रहरीको कामकारवाहीप्रति परिवारजनले शंका व्यक्त गरेका छन् ।

धनुषा प्रहरीका प्रवक्ता रञ्जन अवाले उनीहरु अझै फरार रहेको जानकारी दिए ।