भ्रष्टाचारको नमुनाः धनुषाको नगराईन नगरपालिकामा बजेट पचाउन पिसिसि ढलानमाथि ग्राभेल

न्यूज ब्यूरो, जनकपुरधाम । दक्षिणी धनुषाको नगराई नगरपालिकामा बजेट पचाउन एक वडामा पिसिसि ढलानमाथि नै ग्राभेल गरेर फाईल पेश गरिएको छ ।

भुक्तानीको अन्तिम सेसन चलिरहँदा नगराईन नगरपालिका वडा नं. ४ स्थित विभिन्न स्थानमा भएको पिसिसि ढलानमाथि नै ग्राभेल गरी फोटो खिचेर चेक काटन लगाएको बताईएको छ ।

वडा नं. ४ मा सडक मर्मत सम्भारको लागि कुल ५ लाख रुपैयाँ बजेट राखिएकोमा आवश्यक नै नभएको स्थानमा ग्राभेल हालेर बजेट निकासाको योजनामा रहेको पाईएको छ ।

दुई दिन अगाडी मात्र ढलानमाथि नै ग्राभेल हालेर कोटेशनबाट गरिएको सो योजनाको कार्यको लागि अन्तिम भुक्तानीको लागि फाईल पेश गरिएको एक स्थानीयले बताए । त्यसको लागि वडा नं. ४ का वडाध्यक्ष राजकुमार ठाकुरले सहयोग गरेको बुझिएको छ ।

कार्य सम्पन्नताको लागि वडाध्यक्ष ठाकुरले नै बजेट कुम्ल्याउनको लागि सो योजनामा पिसिसि ढलानमाथि ग्राभेल हालिएको आरोप छ । यद्यपी, यस सन्दर्भमा वडाध्यक्षले प्रतिक्रिया दिन मानेनन् ।