मधेश प्रदेशको स्वास्थ्य मन्त्रालयबाट डा. यादवलाई हटाउने कसरत, कर्मचारीहरुले साथ दिएपछि रोकिए सरुवा

न्यूज ब्यूरो, जनकपुरधाम । मधेश प्रदेशको स्वास्थ्य तथा जनसँख्या मन्त्रालयका सचिव डा. प्रमोद यादवलाई सरुवाको षडयन्त्र गरेका केही कर्मचारीहरुलाई झापड लागेको छ ।

मधेश प्रदेशको स्वास्थ्य मन्त्रालय अन्तर्गत रहेको मधेश स्वास्थ्य विज्ञापन प्रतिष्ठानका केही कर्मचारीहरुले डा. यादवलाई सचिवबाट हटाएर अन्यत्रै पठाउन खोजेपछि मन्त्रालयका कर्मचारीहरुले प्रतिकार गरेको हो ।

एघारौँ तहका कर्मचारी रहेका डा. प्रमोद यादवलाई हटाएर सोही तहका अर्को कर्मचारी पठाएपछि कर्मचारीहरुले प्रतिकार गर्दा हाजिर हुन दिएका छैनन् सङ्घीय मामिला तथा सामान्य प्रशासन मन्त्रालयबाट मधेश प्रदेशको स्वास्थ्य तथा जनसँख्या मन्त्रालयका सचिवमा पठाइएका डा. सञ्जय ठाकुरलाई मन्त्रालयका कर्मचारीहरूले फिर्ता पठाएका छन् ।

स्वास्थ्यतर्फ प्रदेशमा कार्यरत सङ्घका कर्मचारीहरू प्रादेशिक अस्पताल जनकपुरका निर्देशक डा. रामनरेश पण्डित, प्रदेश जनस्वास्थ्य प्रयोगशालाका निर्देशक डा।श्रवण मिश्र, प्रदेश आपूर्ति व्यवस्थापन केन्द्रका निमित्त निर्देशक डा. मनिष पाण्डे र मधेश स्वास्थ्यविज्ञान प्रतिष्ठानका रजिस्ट्रार डा. विनोदकुमार यादवसहित मंगलबार मन्त्रालयमा हाजिर गर्न पुगेका डा.ठाकुरलाई मन्त्रालयका कर्मचारीहरूले पदस्थापित हुन दिएनन् ।

मन्त्रालयका कर्मचारीहरूले प्रदेशकै एघारौँ तहका वरिष्ठ कर्मचारी डा. प्रमोद यादव सचिव हुँदाहुँदै पनि सङ्घले कानुन मिचेर सोही तहका कर्मचारीलाई सचिवका रूपमा पठाएपछि हाजिर हुन नदिइएको बताए ।

मन्त्रालयका कर्मचारीको अवरोधपछि सचिवका रूपमा हाजिर हुन नपाएका सङ्घीय स्वास्थ्य मन्त्रालयका एघारौँ तहका कर्मचारी डा।ठाकुर पदस्थापनाका लागि दबाब दिन मुख्यमन्त्री तथा मन्त्रिपरिषद्को कार्यालय पुगेका छन् । डा. ठाकुरका पक्षमा वकालत गर्न त्यहाँ पुगेका मधेश स्वास्थ्यविज्ञान प्रतिष्ठानका रजिस्ट्रार डा।विनोद जसपा नेतृत्वको पहिलो प्रदेश सरकारका पालामा राजनीतिक नियुक्ति प्राप्त अधिकारी हुन् ।

प्रदेशका स्वास्थ्य तथा जनसँख्या सचिव डा. प्रमोदसँग व्यक्तिगत रिसिइबीका कारण उनी डा. ठाकुरलाई सचिवको कुर्सीमा बसाउन प्रदेशमा कार्यरत सङ्घका अन्य कर्मचारीका पछि लागेर मन्त्रालय पुगेको मन्त्रालयका एक कर्मचारीले बताए ।

‘प्रदेश सरकारलाई सङ्घको लाचार छाया बनाइएको छ । प्रदेशले सचिव नियुक्त गरिसकेपछि सङ्घबाट सचिव पठाउनु भनेको प्रदेशको क्षेत्राधिकार मिच्नु हो । यसले प्रदेश सरकारको अस्तित्व र गरिमा दुवैमाथि प्रहार भएको छ,’ मन्त्रालयका एक कर्मचारीले भने ।

ती कर्मचारीका अनुसार आर्थिक वर्षको अन्त्यमा मन्त्रालयमा सचिव फेरिनुको पछाडि प्रदेशको स्वास्थ्य तथा जनसँख्या मन्त्रालयका कार्यक्रमलाई निष्फल र निष्प्रभावी बनाउने षड्यन्त्र हो ।

कर्मचारी समायोजन ऐनले प्रदेश कानुन बमोजिम प्रदेश सचिवको पदपूर्ति भएपछि त्यस्तो पद स्वतः प्रदेश निजामती सेवाको पद मानिने उल्लेख छ । एघारौँ तहका डा. प्रमोद प्रदेश कानुनबमोजिम सचिवमा नियुक्त पदाधिकारी हुन् । कानुनअनुसार उनको पद अर्थात् मन्त्रालयका सचिव स्वतः प्रदश निजामती सेवाको पद मानिन्छ ।

प्रदेश निजामती कर्मचारी ऐनमा प्रदेश निजामती सेवाका कर्मचारीहरू प्रमुख सचिव र सचिव पदमा बढुवा नहुन्जेलसम्म प्रदेश निजामती सेवाका कर्मचारीबाट विशिष्ठ श्रेणीका कर्मचारीलाई प्रमुख सचिव र राजपत्राकिंत प्रथम श्रेणीका कर्मचारीलाई मन्त्रालयका सचिवमा कामकाज गराउन सकिने उल्लेख छ । सेवा प्रवाह गर्न अपुग भएमा नेपाल सरकारसँग कर्मचारी माग गर्न सक्ने आधारमा सो गर्न सकिने ऐनमा भनिएको छ ।

प्रदेशका मन्त्रालय सचिवमा एघारौँ वा बाह्रौ तहका अधिकृत रहने व्यवस्था छ ।

प्रदेश सचिव डा. यादवले जनकपुरधाम उपमहानगरपालिका वडा नं. १९ स्थित आफ्नो नीजि जग्गा दान गरी योग भवन बनाउने दानी पात्रको रुपमा परिचित छन् ।

(पत्रकार अनिल कर्णको सहयोगमा)