मुख्यमन्त्री चयन सम्बन्धमा मिडिया र समाजिक सँजालमा देखिएको तर्क भ्रमपूर्णः पूर्वमन्त्री कुशवाहा

न्यूज ब्यूरो, जनकपुरधाम । मधेश प्रदेशका पूर्व कृषि मन्त्री एवम् जनमत पार्टीका राष्ट्रिय उपाध्यक्ष रहेका ई. बसन्त कुशवाहाले मुख्यमन्त्री चयन प्रक्रियामा केही मिडिया र समाजिक सँजालमा भ्रम छरिएको बताएका छन् ।

मुख्यमन्त्री चयन सम्बन्धमा मीडिया, पत्रपत्रिका र सामाजिक संजालमा देखिएको अधिकांश तर्क र रिपोर्टिंग भ्रमपूर्ण रहेको उनले बताएका छन्।

जनमत पार्टीले मुख्यमन्त्री सम्बन्धी निर्णय जेठ २४ बिहिवार बिहान ९ बजे मात्र गरेको दाबी गर्दै त्यस अगाड़ीको न्यूज, समाचार र प्रचारबाजी केवल आँकलन, सम्भावना वा अनुमान मात्र रहेकोमा भ्रामक अडकलवाजी चलेको बताए ।

“जनमत पार्टीको संसदीय दलको नेता, उपनेता, प्रमुख सचेतक, सचेतक लगाएत अन्य पदाधिकारी हुनु भनेको दलको प्रशासनिक कार्य, समन्वय र पार्टीको कार्य गर्ने हो। यो पदमा आसिन हुँदैमा मुख्यमन्त्री, मन्त्री, राज्यमन्त्री आदि हुने हैन्। यस सन्दर्भमा अरु पार्टीसंग तुलना गर्नु नै भ्रम सृजना गर्नु हो।”– कुशवाहाले भने ।

उनले भने, –“जनमत पार्टी मधेश प्रदेशमा १३ जना प्रदेश सभा सांसद छन्। पार्टीको बरियता निम्न क्रम अनुसार छ - मा. ई. बसन्त कुशवाहा (राष्ट्रिय उपाध्यक्ष), मा. चन्दन सिंह (राष्ट्रिय महासचिव), मा. संजय यादव (राष्ट्रिय सचिव), मा. शम्भु साह (केन्द्रिय सदस्य), मा. महेश यादव (दलको नेता, प्रदेश समिति सदस्य) र बाकी सबै प्रदेश समिति सदस्यहरु। पार्टीले बरियता हेर्ने हो भने पार्टीको आधार हेर्ने हो, नाकि दलको बरियता।”

अहिलेको मुख्यमन्त्री चयन प्रकिया बिलकुल फरक तरिकाले भएको उनले प्रष्टयाएका छन् । यसलाई अन्य मापदण्डमा तुलना नगरी जनमत पार्टी परिणाम उन्मुख पार्टी रहेको बताउँदै अरुलाई ७ वर्षसम्म हेर्दा जनमत पार्टीलाई कम से कम ७ महिनासम्म हेर्न आग्रह समेत गरे ।