कमला–ढल्केवरदेखि बागमतिसम्म सडक विस्तारको लागि ५२ करोडमा ठेक्का

न्यूज ब्यूरो, जनकपुरधाम । कमला–ढल्केबर–बाग्मती सडक विस्तारका लागि परामर्शदाता छनोट भएको छ। सडक विभाग अन्तर्गतको वैदेशिक महाशाखाको सासेक राजमार्ग विस्तार आयोजनाले कमला-ढल्केबर- बाग्मती सडक विस्तार आयोजनाका लागि परामर्शदाता छनोट गरेको हो।

महाशाखाका अनुसार इन्टरकन्टिनेन्टल कन्सल्ट्यान्ट एण्ड टेक्नोक्रयाट्स इन्डियाले पाएको छ। जसमा यो कम्पनीले नेपाली ३२ करोड ६ लाख ३४ हजार र १४ लाख ९९ हजार ७८२ अमेरिकी डलर (१९ करोड ९४ लाख ७१ हजार) रुपैयाँमा परामर्शदाताको जिम्मा पाएको हो। यसको परामर्शदातालाई दिइने कुल बजेट ५२ करोड रुपैयाँ छ।

कम्पनीले यो सडकको विस्तारदेखि मर्मतलगायतको सबै कुरा यही परामर्शदाता कम्पनीले नै गर्नेछ। निर्माण कार्यको प्रशासनिक काम, निर्माण कार्यको अनुगमन मूल्यांकन, काम भए नभएको ब्रिफिङ तथा बिल प्रमाणित गरि भुक्तानीको लागि सिफारिस गर्ने काम परामर्शदाताले नै गर्नेछन्।

यसको अवधि ८ वर्षसम्मको हुनेछ। सडक निर्माणको लागि ३ वर्ष छुट्याइएको छ भने मर्मत सम्भारका लागि ५ वर्ष छुट्याइएको छ। यी दुवै काम यही परामर्शदाता कम्पनीले नै हेर्नुपर्ने छ।

महेन्द्र राजमार्गअन्तर्गतको कमला–ढल्केबर–पथलैयाको पहिलो प्याकेजमा कमला पुलबाट बाग्मती पुलसम्मको निर्माण प्रक्रिया अगाडि बढेको छ। यसका लागि शाखाले ठेक्का आह्वान समेत गरिसकेको छ।