मधेश प्रदेशमा नयाँ सरकारको लागि दाबी पेश, आजै जनमत नेतृत्वको मन्त्रिमण्डलले सपथ लिने

न्यूज ब्यूरो, जनकपुरधाम । मधेश प्रदेशमा नयाँ सरकार बनाउनको लागि प्रदेश प्रमुख समक्ष दावी पेश गरिएको छ । मधेश प्रदेशकी प्रदेश प्रमुख सुमित्रा भण्डारी समक्ष ६ दलिय गठबन्धनले दावी पेश गरेको हो ।

नेकपा एमाले, नेकपा माओवादी केन्द्र, जनमत पार्टी, नेकपा एस, नागरिक उन्मुक्ति पार्टी र नेपाल संघीय समाजवादी पार्टीले मधेशमा सरकार बनाउन लागेको हो । मन्त्रालय बाँडफाँडको टुंगो लगाउन बसेको ६ वटै दलको बैठकले आज विहान ७ बजे सरकारको दावी पेश गरिने निर्णय गरेको थियो ।

जनमत पार्टी संसदीय दलका नेता महेश प्रसाद यादवले सरकार बनाउन प्रदेश प्रमुखसमक्ष विहान ७ बजे दावी पेश गरिने जानकारी दिए । उनका अनुसार बिहान ११ बजे शपथ ग्रहण कार्यक्रम हुनेछ ।

प्रदेशका ६ दलिय गठबन्धनले जनमतलाई मुख्यमन्त्री दिन सहमति गरिसकेको छ । जनमतले सांसद सतिश कुमार सिंहलाई मुख्यमन्त्री बनाउने निर्णय गरिसकेको छ । सिंह सप्तरी २ (१) बाट निर्वाचित सांसद हुन् ।

स्रोतका अनुसार नेकपा एमालेले चार मन्त्रालय, जनमतले मुख्यमन्त्रीसहित तीन मन्त्रालय, माओवादी र नेकपा एसले २ २ मन्त्रालय लिने सहमति भएको छ ।

जसपा नेपालका मुख्यमन्त्री सरोज कुमार यादव विश्वासको मत गुमाएपछि बुधवार राति प्रदेश प्रमुख भण्डारीले शुक्रवार विहान १० बजेसम्मको समय दिँदै नयाँ सरकारको आह्वान गरेकी छन् ।