पत्रकार विनय घटनाका मुख्य आरोपितलाई हाजिरी जमानीमा छाडिदै

न्यूज ब्यूरो, जनकपुरधाम । धनुषाका पत्रकार विनय कुमार यादवको शंकास्पद मृत्यू प्रकरणमा प्रहरी हिरासतमा रहेका ललन भन्ने लक्ष्मीनारायण यादवलाई हाजिरी जमानीमा रिहा गर्न लागेको खवर प्राप्त भएको छ ।

धनुषा प्रहरीले पत्रकार यादवको घटना मिशिलमा पर्याप्य आधारहरु अझै पेश गर्न नसकेको भन्दै ललनलाई हाजिरी जमानीमा रिहा गर्न लागिएको सरकारी वकिल कार्यालय अधिवक्ता सुदिप दँगालले जानकारी दिए । न्यूज ब्यूरोसँगको कुराकानीमा उनले धनुषा प्रहरीले मिशिल नै पूरा नगरेको कारण उनलाई तत्काल हाजिरी जमानीमा रिहा गरी अनुसन्धान प्रक्रिया अगाडी बढाउने बताए ।

अधिवक्ता दँगालका अनुसार, धनुषा प्रहरीले पटक पटक अनुसन्धानको लागि म्याद थपेपनि मिशिलमा चाहिने आवश्यका कागजातहरु तयार पार्न नसकेर हाजिरी जमानीमा छाडनुपर्ने बाध्यता भएको बताए । उनले पत्रकार विनय यादवको घटना जटिल र सुक्ष्म अनुसन्धानको दायरामा रहेको बताए । घटनाको प्रकृति खुलेपनि सो घटनामा एक जना मात्र सँलग्न हो की अन्य तीन जना सँलग्न छ भनेर प्रहरीले पुष्टि नै गर्न सकेको छैनन् ।

धनुषा प्रहरीको कमि कमजोरीको कारण मुख्य आरोपित ललनलाई सरकारी वकिल कार्यालयबाट हाजिरी जमानीमा छाडन लागिएको हो । अधिवक्ता दँगालले प्रहरीले ढिलासुस्ती गरेर अझै चाहिने प्रमाण जुटाउन नसकेको बताए । सवारी ज्यान वा कर्तव्य ज्यानमा कागजातहरु नै पेश गर्न नसकेको बताए ।