कमला नदीको पूलमा व्यापारः एकातर्फ 'माल असुली' , अर्को तर्फ आन्दोलनको नौटँकी

न्यूज ब्यूरो, धनुषा । बहुप्रतिक्षित कमला नदीको पूल निर्माणको लागि कथित रुपमा गरिएको आन्दोलनले सिरहाका व्यापारीहरु आक्रोसित बनेका छन् ।

हुलाकी सडकखण्डअन्तर्गत धनुषा र सिरहा जिल्ला जोडने बहुप्रतिक्षित कमला नदीको पूल निर्माण कार्य भईरहँदा अन्तिममा आएर केही व्यक्तिहरुले कथित तौरमा आन्दोलन गरी व्यापारीहरुलाई दुःख दिएका छन् ।

भाँसिएको कमला पूलको दक्षिण निर्माण गरिएको काठको अस्थायी पूलबाट निरन्तर हजारौ रुपैयाँ खाँदै आएका कथित आन्दोलनकारीहरुले सिजनल आन्दोलन गरेपछि व्यापारीहरु आक्रोसित बनेका छन् । यतिको दिनदेखि कहिले पनि आन्दोलन नगरेका सिरहाका केही व्यक्तिहरुले व्यक्तिगत स्वार्थमा विलिन भई कतिथ तौरमा आन्दोलन गरेर व्यावसायीहरुलाई दुःख दिए ।

बजेट भाषणको केही घण्टा मात्र बाँकी रहँदा उनीहरुले बजेट भाषणमा कमला पूलको नीति आयोजना समावेश गर्नुपर्ने माग गरे । यतिको दिनदेखि नीति निर्माण भईरहँदा चुप्पी लादेर बसेका उनीहरुले बजेटको अन्तिम समयमा नाटकरुपी आन्दोलन थाले । जसले सिरहाका सटर व्यावसायीहरुलाई दुःख भोग्नुपर्यो । सिरहाका बजार बन्द गराएपछि व्यापारीहरु मर्माहित भए ।

कमला पूल निर्माण संघर्ष समितिका अगुवा रविन्द्र साहले यसअघि कमला नदिमा निर्मित अस्थायी पूलबाट कमिशन खाँदै आएका थिए । अहिले पनि साह सोही पूलबाट कमिशन खाँदै आएका छन् । पूल पार गर्ने यात्रुसँग ५० रुपैयाँ लिने गरेको छ । दैनिक रुपमा २० देखि ३० हजार रुपैयाँसम्म असुली हुँदा अस्थायी पूल बनाउनेहरुले सरकारलाई कुनै राजस्व दिएका छैनन भने सो रकम प्रहरी, नेता, कार्यकर्ता केही भनौँदा, पत्रकारहरुलाई बाँडफाँड गर्दै आएका छन् ।

सार्वजनिक नदीमा नीजि पूल बनाएर यात्रुहरुसँग अवैद्य रुपमा रकम असुली गरिदै आएको छ । सोही प्रकरणमा रविन्द्र साहले सोही पूलबाट विगत ३ बर्षदेखि कमिशन खाँदै आएका हुन् । साहले देखावटी रुपमा आन्दोलन गरी पत्याउन खोजेपछि व्यापारीहरु आक्रोसित बनेका छन् ।

यतिको दिनदेखि कमला नदीमा पूल निर्माण कार्य जारी रहँदा उनी देखिएनन् । बर्षातको मौसम आएपछि र निर्माण कार्य ठप्प हुने स्थिति आएपछि उनी नौटकीँ थालेको बताईएको छ । रविन्द्र साह अझै अस्थायी पूलबाट असुली गरिरहेका छन् । जानकारी अनुसार, सो पूल निर्माणमा उनको पनि लगानी रहेको छ ।

गत बर्ष सिरहा नगरपालिकाले यात्रुहरुको लागि आवतजावत निःशुल्क गरेपछि उनीहरुको निर्देशनमा रातोरात सो पूल भत्काइएको थियो । सार्वजनिक पूल भत्काएर आफ्नो नीजि पूल बनाउँदै रकम असुलीको धन्दा बनाएको हो ।

कमला नदीमा पानी कम भएर मोटरसाईकलहरु पानीबाटै आरपार हुन थालेपछि पूलबालाहरुले डोजरले नदीमा खाल्डो खनेर पूलमा यात्रुलाई डाईभर्सन गर्न बाध्य बनाएर बिजनेस थालेको हो ।

आन्दोलनको क्रममा कमला पूल निर्माण भन्दा प्रहरी प्रशासन मुर्दावादको नारा लगाउन थालेपछि व्यापारीहरुले उनीहरुको मकसद बुझेको थियो । अर्कै काण्डमा पक्राउ परेका एक जनालाई प्रहरीले रिहा नगरेपछि कमला पूलसँग जोडेर प्रहरी प्रशासनको विरुद्ध नारावाजी गरेको एक व्यापारीले बताए ।